विश्वप्रकाश शर्माको दाबी – दलको नेतामा देउवाले अरु कसैलाई प्रस्ताव गर्नु उचित हुन्छ  

काठमाडौं । नेपाली कांग्रेसका महामन्त्री विश्वप्रकाश शर्माले सत्ताको आकांक्षाका लागि अर्को गठबन्धन बनाउन नहुने दाबी गरेका छन्। महामन्त्री शर्माले पार्टी सभापति एवं प्रधानमन्त्री शेरबहादुर देउवालाई संसदीय दलमा उम्मेदवारी दिनु उचित नहुने समेत बताएका छन् ।

मंगलबार काठमाडौंमा आयोजित एक कार्यक्रममा उनले देउवा आफैंले अर्को कुनै नेतालाई प्रस्ताव गर्न उपयुक्त हुने सुझाव दिएका हुन् । देउवाले प्रधानमन्त्री भएर धेरै राम्रा कामहरु गरेपनि पटकपटक प्रधानमन्त्री हुने चाहना राखेको भन्दै राम्रा कामहरुको चर्चा हुन नसकेको महामन्त्री शर्माले बताए ।

‘यो बेला उहाँका सामुन्ने पनि के अवसर छ भने म ५ पटक प्रधानमन्त्री भइसकेँ, मसँगै यात्रा गरेको रामचन्द्र पौडेललाई एक पटक दिन्छु भन्न सक्नुपर्छ । उहाँको सम्मानजनक बहिर्गमन हुनेछ’ उनले भने, ‘यदि उहाँले जनजातिबाट प्रकाशमान सिंह, प्रतिस्पर्धी डा. शेखर कोइराला, मधेसी प्रधानमन्त्री बनाउँछु भनेर विमलेन्द्र निधि, बिपीको छोरालाई दिन्छु भनेर डा. शशांक कोइराला वा युवालाई प्रधानमन्त्री हुनुपर्छ भनेर गगन थापालाई अघि सार्नुभयो भने उहाँले गरेर पनि छोपिएको राम्रा कामहरु माथि आउनेछन् ।’