सडक निर्माणको काम तत्काल सुरु नभए आन्दोलन गर्ने विप्लवको चेतावनी 

काठमाडौँ । नेत्रविक्रम चन्द विप्लव नेतृत्वको नेकपाले लमही–घोराही–तुलसीपुर चार लेन सडक निर्माणको काम तत्काल सुरु नभए आन्दोलन गर्ने चेतावनी दिएको छ । नेकपा दाङका सेक्रेटरी जनक सीले एक विज्ञप्ति जारी गर्दै उक्त सडक निर्माण अविलम्ब नगरे आन्दोलनमा उत्रने चेतावनी दिएका हुन् ।                          

उनले लमही–घोराही–तुलसीपुर चार लेन सडक निर्माणमा लापरबाही समेत भएको आरोप लगाएका छन् । सेक्रेटरी सीले निर्माणमा ढिलासुस्ती गरे चरणबद्ध संघर्षमा जाने चेतावनी दिए । 

‘लमही–घोराही–तुलसीपुर फोर लाइन सडक निर्माणमा भइरहेको लापरबाही र ढिलासुस्तीका कारण हजारौं जनताले दुःख पाउनुका साथै सडकको धुँलोले जनस्वास्थ्यमा गम्भीर असर पारिरहेको छ’, विज्ञप्तिमा भनिएको छ,  ‘उक्त सडक निर्माण कार्य सूचारु नगरे चरणवद्ध आन्दोलन र संघर्षमा जाने सबै सरोकारवाला निकायलाई जानकारी गराउदछौँ ।’