पुस ३ पछि मात्रै कांग्रेसले संसदीय दलको नेता छान्ने

काठमाडौँ। गत मंसिर ४ गते सम्पन्न भएको आमनिर्वाचनको केही दिन अघि मात्रै निर्वाचन आयोगले अन्तिम नतिजा सार्वजनिक गरेको छ। सो नतिजा अनुसार  नेपाली कांग्रेसले पुस ३ गते आइतबारपछि मात्रै संसदीय दलको नेता  छान्ने प्रक्रियाअघि बढाउने भएको छ।

प्रतिनिधि सभामा प्रत्यक्षतर्फ सबैभन्दा धेरै ५७ सिट र समानुपातिकतर्फ ३२ गरी नेपाली कांग्रेसले ८९ सिटमा जित निकालेको छ। कांग्रेसले संसदीय दलको नेता कहिले र कसलाई छान्ला भन्नेमा सबैको धेरै चासो छ ।

यसैक्रममा निर्वाचन आयोगले प्रतिनिधि सभातर्फ समानुपातिक सांसदलाई पुस ३ गते प्रमाण पत्र दिने भएको छ। समानुपातिक सांसदले निर्वाचित भएको प्रमाण पत्र बुझेपछि मात्रै संसदीय दलको नेता चयनका बारेमा छलफल अघि बढाइने कांग्रेस स्रोतले जनाएको छ।

संसदीय दलको नेता चयन सहमतिमा गर्ने कि चुनावबाट गर्ने भन्ने बारे टुंगिएको छैन।

कांग्रेसमा २०७४ सालको चुनावपछि पनि संसदीय दलको नेता चयनमा चुनाव भएको थियो। यसपालि पनि धेरै सांसदले संसदीय दलको नेता हुने चाहना राखेकोले चुनाव हुन सक्ने देखिएको छ।

प्रधानमन्त्री तथा कांग्रेस सभापति शेरबहादुर देउवा पुन: संसदीय दलको नेताका लागि उम्मेदवार हुने तयारीमा छन्। देउवा फेरि प्रधानमन्त्री बन्ने तयारीमा जुटेका छन्। तर यता संसदीय दलको नेतामा महामन्त्री गगन थापाले दाबी गरिरहेका छन् भने अर्का नेता डा.शेखर कोइरालाले पनि उम्मेदवारी दिने बताइरहेका छन ।