मकवानपुर १ मा कमल थापा र डिनालाई पराजित गर्दै दीपक सिंह विजयी

काठमाडौँ।  मकवानपुर क्षेत्र नम्बर १ मा राष्ट्रिय प्रजातन्त्र पार्टी (राप्रपा)का दीपकबहादुर सिंह २ हजार ३९३ मत अन्तरसहित विजयी भएका छन्। यो क्षेत्रमा ९१ हजार ४ सय ८६ मत खसेको थियो ।

सिंहले लोकतान्त्रिक बाम गठबन्धनको तर्फबाट उम्मेदवार बनेकी नेपाली कांग्रेसकी केन्द्रीय सह–महामन्त्री महालक्ष्मी उपाध्याय डिनालाई २ हजार ३ सय ९३ मतान्तरले हराउदै प्रतिनिधि सभा सदस्यमा निर्वाचित भएका हुन्। 

 सिंहले २७ हजार ८ सय १४ मत प्राप्त गर्दा उनका प्रतिस्पर्धी डिनाले २५ हजार ४३४ मत प्राप्त गरिन्। 

यस्तै एमालेबाट सूर्य चुनाव चिन्ह लिएका राप्रपा नेपालका अध्यक्ष कमल थापाले २५ हजार ४ सय २० मत प्राप्त गरे । 

सिंहले पहिलो पटक संसदीय चुनाव जितेका हुन् । सिंह यसअघि २०५४ सालमा तत्कालीन हेटौँडा नगरपालिकाको मेयर पदमा नेकपा एमालेका डोरमणि पौडेलसँग, २०५६ मा मकवानपुर क्षेत्र नम्बर–२ मा प्रतिनिधि सभा सदस्य पदमा एमालेकै विरोध खतिवडासँग, २०६४ को संविधानसभा सदस्य चुनावमा नेकपा एमालेका अनन्त पौडेलसँग पराजित भएका थिए।