नवलपुर २ को प्रदेशसभाका दुवै सीटमा एमाले उम्मेदवार विजयी

पोखरा । पूर्वी नवलपरासी क्षेत्र नम्बर २ का दुवै प्रदेशसभा निर्वाचन क्षेत्रमा एमालेका उम्मेदवार विजयी भएका छन् । नवलपुर २ (१) मा एमालेकी पद्मा जिसीले १९ हजार ३७८ मतसहित र नवलपुर २ (२) मा लक्ष्मण पाण्डे १८ हजार ८०६ मत ल्याएर विजयी भएका हुन् ।

नवलपुर २ (१) मा जिसीका निकटम प्रतिस्पर्धी माओवादी केन्द्रका सौगम सिरपाइलीले १४ हजार ७४३ मत ल्याए । २ (२) मा पाण्डेका निकटम प्रतिस्पर्धी नेकपा एसका उम्मेदवार गोपाल खनालले १४ हजार ७६१ मत पाए ।

योसँगै एमालेले प्रदेशसभामा ४ सिट जितेको छ । एमालेले तनुहँ र कास्कीमा १÷१ सिट जितिसकेको छ । हालसम्म प्राप्त विवरण अनुसार कांग्रेसले सर्वाधिक धेरै १० सिट जितेको छ । कांग्रेसले बागलुङमा ४, मुस्ताङमा २, गोरखामा २, तनहुँ र म्याग्दीमा हालसम्म १÷१ सिट जितेको छ ।