सुदूरपश्चिममा २५ हजार सुरक्षाकर्मी खटिए

काठमाडौँ । यही मंसिर ४ गते हुने प्रतिनिधिसभा र प्रदेशसभा सदस्य निर्वाचनका लागि सम्पूर्ण तयारी पूरा भएसंगै मतदान स्थलको सुरक्षाका लागि नेपाल प्रहरी, सशस्त्र प्रहरी, नेपाली सेना र म्यादी प्रहरीसहितका टोली खटिएका छन्। 

सुदूरपश्चिम प्रदेशका ९ वटै जिल्लाका मतदानका लागि सबै तयारी पूरा भएको प्रदेश निर्वाचन कार्यालयले जनाएको छ ।

निर्वाचन शान्तिपूर्वक सम्पन्न गर्नका लागि सुदूरपश्चिम प्रदेशका नौ जिल्लामा २५ हजारभन्दा बढी सुरक्षाकर्मी खटिएको सुदूरपश्चिम प्रदेश प्रहरी कार्यालयले जनाएको हो ।

कार्यालयका अनुसार ६ हजार ४१० जना जनपद प्रहरी, ११ हजार ५५९ म्यादी परिचालन भएका छन् भने त्यतिकै संख्यामा शसस्त्र प्रहरी र नेपाली सेना खटाइएको छ । सुदूरपश्चिममा प्रदेशका नौ वटा जिल्लामा १७७ वटा मोबाइल टोली र २० वटा ‘रिजर्भ फोर्स’ तयारी अवस्थामा राखिएको सुदूरपश्चिम प्रदेश प्रहरीले जनाएको छ ।

सुदूरपश्चिम प्रदेशभर १ हजार १ सय ६१ वटा मतदानस्थल बनाइएको छ । तीमध्ये सुरक्षाको दृष्टिकोणले अतिसंवेदनशील, संवेदनशील र सामान्य गरी तीन भागमा वर्गीकरण गरिएको छ ।

सुदूरपश्चिममा प्रतिनिधिसभातर्फ १६ र प्रदेशसभाका ३२ निर्वाचन क्षेत्र रहेका छन् । यहाँ कूल १६ लाख ५६ हजार ४ जना मतदाताले मतदान गर्न पाउनेछन् ।

प्रतिनिधिसभाका सबैभन्दा बढी पाँच निर्वाचन क्षेत्र रहेको कैलालीमा ५ लाख ३५ हजार ५१४ मतदाता रहेका छन् भने सबैभन्दा कम बाजुरामा ८३ हजार पाँच सय ६७ मतदाता छन् ।