कर्मचारी चुनावमा खटिएपछि नागरिकता र राहदानी वितरण स्थगित

काठमाडौँ । मङ्सिर ४ गते सम्पन्न हुँदै गरेको प्रदेश तथा प्रतिनिधिसभा निर्वाचनमा कर्मचारी खटिएपछि रसुवाका विभिन्न कार्यालयमा कर्मचारी अभाव भएको छ। कर्मचारी अभावका कारण जिल्ला प्रशासन कार्यालय रसुवाले दिँदै आएको नागरिकता वितरणलगायतका कार्य पुन: स्थगित भएको छ। आसन्न निर्वाचनमा आवश्यक कर्मचारी खटाइएको र कार्यालयमा कर्मचारीको अभाव भएका कारण निर्वाचनसम्बन्धी कामबाहेक अन्य सबै प्रकारका सेवा बन्द गरिएको हो। 

प्रशासनले सार्वजनिक सूचनामार्फत् नेपाली नागरिकताको प्रमाणपत्र, राहदानी, राष्ट्रिय परिचयपत्र, नाबालक परिचयपत्र, संस्था दर्ता तथा नवीकरणलगायतका सबै सेवा हिजो मंगलबारदेखि आगामी मङ्सिर ४ गतेसम्म बन्द भएको जनाएको छ।

निर्वाचन  शान्तिपूर्ण रुपले सम्पन्न गर्न स्थानीय प्रशासन क्रियाशील रहेको र निर्वाचन कार्य सम्पन्न नभएसम्मका लागि जिल्लाभर मदिरा बिक्रीमा समेत रोक लगाइएको प्रमुख जिल्ला अधिकारी नवराज जैसीले बताए । 

मंसिर ४ मा हुने निर्वाचनका लागि आवश्यक सबै तयारी पूरा भएको प्रशासनले जनाएको छ।