कालापानी फिर्ता लिन ओलीजीले यहाँ आएर बोलेर हुँदैन, भारतसँग बोल्न पर्छ : देउवा

काठमाडौं । आज कार्तिक २३ गते बुधबार दार्चुलाको गोकुलेश्वरमा आयोजित सत्ता गठबन्धनको आमसभालाई सम्बोधन गर्दै गठबन्धनका वरिष्ट नेताहरुले एकपछि अर्को गर्दै एमालेका अध्यक्ष केपी शर्मा ओलीलाई चुनौती र जवाफ दिएका छन्। नेपाली कांग्रेसका सभापति समेत रहेका प्रधानमन्त्री शेरबहादुर देउवाले सीमा समस्या समाधान गर्नका लागि आफू प्रतिबद्ध रहेको र देशको भूमि कालापानी, लिपुलेक र लिम्पियाधुरा नेपालको हो भनेर संसदले बहुमतले पारित गरेको बताए ।

उनले संसद्ले एकमतले नेपालको नक्सामा राखेको भूमिलाई लिएर राजनीति गर्नुभन्दा पनि भारतसँग वार्ता गरेर फिर्ता ल्याउनुपर्ने बताएका हुन् ।

उनले भने, ‘यो भूमि फिर्ता लिनका लागि भारतसँग कुरा गर्नुपर्छ। सम्पूर्ण एक भएर वार्ता गरेर भूमि फिर्ता ल्याउनुर्छ । ओलीजीले यहाँ आएर बोलेर हुँदैन । भारतसँग कुरा गर्नसक्नुपर्छ। हामी कुटनीतिक रुपमा पहल गछौँ ।’

नेपालकै भूमि फिर्ता ल्याउन सबै राजनीतिक दल एकमत रहे पनि एमाले अध्यक्ष ओलीले भने राजनीति गरिरहेको र आफूले मात्रै नक्सामा भूमि राखेको भनेर भ्रम फैलाएको देउवाको ओलीलाई जवाफ छ। 

गत शुक्रबार नेकपा एमालेले दार्चुला सदरमुकाम खलंगामा चुनावी अभियान आमसभा गरेको थियो।