बैतडीको चुनावी सभालाई देउवा र प्रचण्डले सम्बोधन गर्ने 

काठमाडौँ । गठबन्धन दल नेपाली कांग्रेसका सभापति एवं प्रधानमन्त्री शेरबहादुर देउवा र नेकपा (माओवादी केन्द्र)का अध्यक्ष पुष्पकमल दाहाल प्रचण्डले भोलि बुधबार बैतडी आउने कार्यक्रम तय भएको छ। बुधबार दिउँसो बैतडीको पाटनमा हुने चुनावी सभालाई प्रभानमन्त्री देउवा र नेकपा माओवादी केन्द्रका अध्यक्ष दाहालले सम्बोधन गर्ने निधो भएको नेपाली कांग्रेस बैतडीका सचिव देवराज जोशीले बताए 

बुधबार बिहान दार्चुलाको गोकुलेश्वरमा आयोजना हुने चुनावी सभालाई सम्बोधन गरेर दुवै वरिष्ट नेता बैतडीको पाटन आउने कार्यक्रम तय भएको उनले जानकारी दिए ।  

बैतडीमा नेपाली कांग्रेस, माओवादी केन्द्र र एकीकृत समाजवादीले गठबन्धन गरेर चुनावमा सहभागी हुँदैछन्। प्रतिनिधिसभा सदस्यका लागि माओवादी केन्द्रका पोलिटब्युरो सदस्य नरेन्द्र कुँवर साझा उम्मेदवारका रुपमा चुनावी मैदानमा हुनुहुन्छ भने सुदूरपश्चिम प्रदेश सभा सदस्य (क) मा  नेपाली कांग्रेसका वीररबहादुर विष्ट र प्रदेशसभा (ख) मा नेपाली कांग्रेसका शिवराज भट्ट साझा उम्मेदवारका रुपमा चुनावी प्रतिस्पर्धामा रहेका छन्।  

यसअघि कात्तिक १८ गते बैतडीको पाटनमा नेकपा (एमाले) अध्यक्ष केपी शर्मा ओलीले एमालेको चुनावी सभालाई सम्बोधन गरिसकेका छन् ।