प्रधानमन्त्री देउवालाई सरकारी खर्चमा डडेलधुरा जान आयोगले रोक्यो

काठमाडौं । निर्वाचन आयोगले नेपाली काँग्रेसका सभापतिसमेत रहेका प्रधानमन्त्री शेरबहादुर देउवाको सरकारी खर्चमा डडेल्धुरा जाने यात्रा स्थगित गर्न निर्देशन दिएको छ ।

सरकारी खर्चमा प्रधानमन्त्री देउवा चुनावी प्रचारप्रसारका लागि गृहजिल्ला डडेल्धुरा जाने तयारीमा थिए । तर, त्यसक्रममा प्रधानमन्त्री तथा मन्त्रिपरिषद् कार्यालयले अनुमतिका लागि निर्वाचन आयोगमा पत्र पठाएको थियो । उक्त पत्रको सम्बोधन गर्दै निर्वाचन आयोगले सरकारी खर्चमा प्रचारप्रसारका लागि यात्रा नगर्न र नगराउन आदेश दिने निर्णय गरेको हो ।

सरकारी कामका लागि नभई प्रचारप्रसारकै लागि जान खोजेकोले अनुमति दिन नसक्ने भन्ने निर्णय भएको स्रोतले बताएको छ ।

आयोगले यसअघि प्रधानमन्त्री र मन्त्रीहरूलाई आफू उम्मेदवार भएको क्षेत्रबाहेक अन्यत्र प्रचारमा जान नदिने भनी आचारसंहितामा व्यवस्था गरेको थियो ।

चौतर्फी दबाबपछि सरकारी स्रोतसाधन प्रयोग नगर्ने गरी आयोगको अनुमतिबाट मात्रै जान पाउने व्यवस्था परिमार्जन गरेको हो । तर, सरकारी सवारी साधनबाटै जान खोजेपछि प्रधानमन्त्रीको यात्रामा रोक लगाएको स्रातले बतायो ।

डडेलधुरा प्रधानमन्त्री देउवाको निर्वाचन क्षेत्र हो । भोलिदेखि हुने चुनावी कार्यक्रममा सहभागी हुन प्रधानमन्त्री देउवा बुधबार आज नै डडेलधुरा जाने तयारी थियो ।