राप्रपाको घोषणापत्र  सार्वजनिक : प्रदेशको खारेजी, नेपाल बन्द नहुने 

काठमाडौं । राष्ट्रिय प्रजातन्त्र पार्टी (राप्रपा) ले प्रतिनिधि सभा तथा प्रदेश सभा चुनावलाई केन्द्रमा राखेर सोमबार निर्वाचन घोषणापत्र सार्वजनिक गरेको छ। 

आगामी ४ मङ्सिरमा हुँदै गरेको प्रदेश तथा प्रतिनिधिसभा निर्वाचनका लागि राप्रपाले आज राजधानीमा पत्रकार सम्मेलन गर्दै घोषणापत्र सार्वजनिक गरेको हो।  उक्त गरेको घोषणापत्रमा अभिभावकीय संस्थाका रुपमा राजसंस्था र जनताबाट प्रत्यक्ष निर्वाचित कार्यकारी प्रधानमन्त्री हुनुपर्ने उल्लेख छ ।

उक्त प्रतिवद्धता पत्र सार्वजनिक गर्दै राप्रपाका अध्यक्ष राजेन्द्र लिङ्देनले चुनावमा आफुले  जिते निशुल्क स्वास्थ्य र शिक्षालाई जोड दिने बताए। 

साथै पूर्ण समानुपातिक संसद हुनुपर्ने उनको प्रस्ताव छ । प्रदेशलाई खारेज गरेर केन्द्र र बलियो स्थानीय तह भएको दुई तहको शासकीय स्वरुप हुनुपर्ने पनि उनले बताए

उनले भने,’ आगामी चुनावमा निर्वाचित भए दिगो आर्थिक वृद्धिमा जोड दिइनेछ। उच्चस्तरीय नागरिक आयोग गठन गरी  शीर्ष नेताहरुको सम्पत्ती सार्वजनिक गर्ने कानुन बनाइनेछ र जेष्ठ नागरिक र असक्तहरुको घरमै स्‍वास्थ्य सेवा उपलब्ध इनेछ ।’

एक व्यक्तिले दुई कार्यकालभन्दा धेरै पार्टी अध्यक्ष, प्रधानमन्त्री जस्ता कार्यकारी पदमा बस्न नपाउने, उच्चस्तरीय नागरिक अयोग गठन गरी २०४६ पछिका उच्चपदस्थ नेता तथा कर्मचारीको सम्पत्ति छानविन गरी अवैध सम्पत्ति जफत गर्ने कानुनी व्यवस्था गर्ने पनि राप्रपाको घोषणापत्रमा उल्लेख छ ।

घोषणापत्रमा राप्रपाले नेपाल बन्द जस्तो कार्यक्रम कहिल्यै नगर्ने प्रतिवद्धता समेत जनाएको छ ।