माधव नेपाल नेतृत्वमा रहेको बेलाको पो एमाले अब एमाले ‘एमाले’ रहेन : प्रचण्ड

काठमाडौँ। सत्तारुढ दल नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले केपी शर्मा ओली नेतृत्वको नेकपा एमाले अब ‘एमाले’ नभएको जिकिर गरेका छन्। 

आइतबार सुदूरपश्चिमको राजधानी धनगढीमा आयोजना गरिएको सत्ता गठबन्धनको प्रशिक्षण कार्यक्रममा प्रचण्डले संविधान जोगाउन र प्रतिगमन सच्याउन गठबन्धनलाई विजयी बनाउन र भोट हाल्न आग्रह गरेका हुन्।

प्रचण्डले भने, ‘बामपन्थी र कांग्रेसको गठबन्धनले इतिहासमा ठूला ठूला परिवर्तन भएका छन, त्यसैले यो देश जोगाउन, संविधान जोगाउन र प्रतिगमन सच्याउने चुनाव हो, गठबन्धनमा निर्धक्क भोट हाल्नुहोला।’

‘जतीबेला शान्ति सम्झौतामा गिरिजा प्रसाद कोइराला र मैले हस्ताक्षर गर्‍यौं, त्यतीबेला मैले रुखमा भोट हाली सकेँ। अनी गरिजाबाबुले पनि हँसिया हतौडामा भोट हालिसके,’ प्रचण्डले भने। उनले चुनाव चिह्न देख्दा भोट हालौं की नहालौं भन्ने कुरा त्यागिदिन आग्रह गरे। 

‘अहिलेको एमाले एमाले होइन, माधवकुमार नेतृत्वमा रहेको बेलाको पो एमाले हो। विस्तृत शान्ति सम्झौताका बेला ओली नेतृत्वमा हुन्थे भने अहिले यो व्यवस्था आउने थिएन’ दाहालले भने।

उनले, ओली नेतृत्वको गठबन्धनलाई अपवित्र, अप्राकृतिक र प्रतिगमनको संज्ञा दिए। 

दाहालले गठबन्धनको दाँयाबाँया जाने कार्यकर्तालाई चेतावनी दिँदै भने, ‘गठबन्धनमा सहभागी नहुने कार्यकर्ता त्यो पार्टीमा बस्ने हक राख्दैन, हामीले तुरुन्त कारवाही गर्ने भनेका छौं, गरिपनि रहेका छौं।’