राजेन्द्र लिङ्देनले भने- राप्रपाले समानुपातिकतर्फ ३० लाख भोट ल्याउँछ  

काठमाडौँ। राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले आगामी ४ मङ्सिरमा हुने प्रतिनिधि सभाको निर्वाचनमा राप्रपाले समानुपातिकतर्फ ३० लाख भोट ल्याउने जिकिर गरेका छन् । आइतबार काठमाडौंमा आयोजित काठमाडौं शुभकामना आदानप्रदान कार्यक्रमलाई सम्बोधन गर्दै अध्यक्ष लिङ्देनले अघिल्लो निर्वाचनका बेलाभन्दा राप्रपाले यसपटक राम्रो प्रगति गर्ने बताएका हुन् । 

उनले यो पटकको चुनावमा राप्रपा उच्च मनोबलका साथ अघि बढेको उल्लेख गर्दै राष्ट्रप्रेमी जनताले साथ दिने उल्लेख गरे । लिङ्देनले भने–‘आगामी मंसिर ४ गते देशमा सबैभन्दा ठूला महायज्ञ हुँदैछ । त्यो महायज्ञमा हामीले सही पार्टी, सही र सही सिद्धान्त बोकेका सही नेतृत्व छान्न आवश्यक छ । त्यो मौका गुमाइयो भने यो महायज्ञ असफल हुनेछ ।’  

उनले राप्रपा नेपाली संस्कार, संस्कृति, हिन्दू धर्म र परम्परालाई जोगाउन २०६२/६३ को आन्दोलनदेखि लगेको बताए । मुलुकमा राजासहितको प्रजातन्त्रलाई स्थापित गर्दै संघीयता खारेजीको लागि लडिरहेको बताए । राप्रपाले प्रदेशको विरोध गरिरहँदा कतिपयले प्रदेशको विरोध गर्ने अनि त्यसैमा उम्मेदवारी दिने भन्दै प्रश्न उठाएकोप्रति लिङ्देनले भने–‘हामीले प्रदेशमा उम्मेदवारी दिएनौँ भने जसले प्रदेश चाहिन्छ भनेर भागबण्डा गरी खाइरहेका छन् तिनीहरु फेरि त्यहाँ प्रतिनिधित्व गरेर आउँछन्, हामीलाई छिर्न दिँदैनन् । त्यसैले हामीले पनि त्यसमा भाग लिएर विजयी भइ संसदमा पुगेर प्रदेशको खारेजीको पहल गर्नुपर्छ भन्ने लागेर प्रदेशमा उम्मेदवारी दिएका हौं ।’