राजु गुरुङले दिएको रिटमाथिको सुनुवाइ स्थगित

काठमाडौँ। सत्ता साझेदार दल नेकपा (एकीकृत समाजवादी)को तर्फबाट उम्मेदवार बनेका रुपन्देही  २ का उम्मेदवार राजु गुरुङले आगामी प्रतिनिधिसभा सदस्यका लागि आफ्नो उम्मेदवारी कायम गराउन सर्वोच्च अदालतमा दिएको रिटमाथिको सुनुवाइ स्थगित भएको छ ।

आफ्नो उम्मेदवारी कायम नै हुनुपर्ने माग गर्दै निर्वाचन आयोग लगायतलाई विपक्षी बनाइएको रिटको पेसी शुक्रबार न्यायाधीश हरिप्रसाद फुयालको इजलासमा तोकिएको थियो। बिहीबार सर्वोच्चमा परेको उक्त रिट शुक्रबार पेसी चढेको थियो ।

एकीकृत सजावादीका नेता गुरुङकले रुपन्देही निर्वाचन क्षेत्र नं २ बाट सत्ता गठबन्धनको तर्फबाट प्रतिनिधिसभा सदस्यका लागि उम्मेदवारी दिएका थिए । तर एकीकृत समाजवादीका नेता गुरुङ कालोसूचीमा रहेको भन्दै निर्वाचन अधिकृतको कार्यालयले मनोनयन खारेज गरिदिएको थियो ।

तर आफू व्यक्तिगत रुपमा कालोसूचीमा परेको नभई आफ्नो कम्पनी मात्रै कर्जा सूचना केन्द्रको कालोसूचीमा परेको र उक्त निर्णय बदरका लागि अदालत पुगी मुद्दा विचाराधीन रहेको भन्दै निर्वाचन अधिकृतको निर्णयविरुद्ध गुरुङ बिहीबार सर्वोच्च गएका थिए ।

यस्तै, सोही निर्वाचन क्षेत्रमा मनोनयन दिएका ‘हाम्रो नेपाली पार्टी’का तर्फबाट उम्मेदवारी दर्ता गरेका डा. कमल भुसाल (निकोलस)को पनि उम्मेदवारी आयोगले खारेज गरिदिएको छ ।