अमेरिकी सहायक विदेशमन्त्री एलिजावेथ भोलि नेपाल आउँदै 

काठमाडौं । अमेरिकी सहायक विदेशमन्त्री एलिजाबेथ केनेडी ट्रुडो नेपाल आउने भएकी छिन् । विश्वव्यापी सार्वजनिक मामिला हेर्ने उनी भोलि (बुधबार) नेपाल आउन लागेकी हुन् ।

उनी नेपालसहित युएई, उज्वेकिस्थान र किर्गिज रिपब्लिकको १२ दिने लामो समयको भ्रमणमा रहेको अमेरिकी विदेश मन्त्रालयले जारी गरेको विज्ञप्तिमा उल्लेख छ । 

नेपालमा उनले सीमान्त समूहका अभियन्ता, सञ्चारमाध्यम तथा बिगतमा भएका आदनप्रदान कार्यक्रमका पूर्व सहभागीहरूसँग राउन्टेबल छलफलमा सहभागी हुने कार्यक्रम छ । 

भ्रमणमा उनले भेट्ने अल्पसंख्यक समूहका अभियन्ता को हो भन्नेबारेमा परराष्ट्र मन्त्रालयसँग सम्पर्क गर्न खोज्दा सम्पर्क भएन । तर, प्रधानमन्त्रीका परराष्ट्र सल्लाहकार अरुणकुमार सुवेदीसँग यसबारेमा जिज्ञासा राख्दा ट्रुडोको दुई दिने भ्रमण तालिका परराष्ट्र मन्त्रालयसँग रहेको स्पष्ट पारे । भने, “तालिकाअनुसार नै कार्यक्रममा सहभागी रहने र सुरक्षाको व्यवस्था मिलाएका छौँ ।”