नागरिकता विधेयक र चुनावी मतलाई एउटै रूपमा हेर्न मिल्दैन: लोसपा

काठमाडौँ। लोकतान्त्रिक समाजवादी पार्टी (लोसपा) का शिर्ष नेताहरुले नागरिकता विधेयक र चुनावी मतलाई एउटै रूपमा हेर्न नहुने बताएका छन्। 

दुवै सदनबाट पारित भएर पठाएको नागरिकता विधेयक राष्ट्रपति विद्यादेवी भण्डारीले प्रमाणीकरण नगरेको भन्दै विरोधमा उत्रिएको (लोसपा) ले चुनावी तालमेल भने एमालेसँगै गर्ने प्रयास गरेको छ।

लोसपाका वरिष्ठ नेता राजेन्द्र महतोले नागरिकता विधेयकलाई प्रमाणीकरण हुन नदिन एमाले, कांग्रेस, माओवादी सबैले षडयन्त्र गरेको जिकिर गरे।

‘हिजो एमालेले ल्याउँदा कांग्रेस र माओवादी मिलेर रोकेका हुन्। यस पटक एमालेले त्यसको विरोध गरेपछि राष्ट्रपतिबाट रोकियो,’ महतोले भने, ‘यो प्रकरण चुनावसँग जोडिदैन। हामी तालमलेका लागि सबैसँग खुला छौ। चुनावी तालमेल भनेको भोटको लेनदेन हो।’

उनले चुनावी तालमेललाई नीतिगत रूपमा हेर्न नमिल्ने र सत्ता गठबन्धनसँग तालमेलको सम्भावना सकिदै गएको उनले बताए।

‘सत्ता गठबन्धनको आफैंभित्र मारामार छ। हामी कहिलेसम्म कुरेर बस्ने? चुनावी तालमेलका लागि एमालेसँग प्रयास भइरहेको छ,’ उनले भने, ‘कांग्रेस र माओवादीको एजेण्डा नमिलेजस्तै हामी र एमालेको नमिल्न सक्छ। 
‘

लोसपाका अर्का कार्यकारिणी सदस्यल केशव झाले नागरिकता विधेयक प्रमाणीकरण नभएको विरोधमा आउनेलाई समर्थन गर्ने र एमालेसँगको तालमेल पनि अघि बढ्ने बताए।