ओलीले भने- गठबन्धनका घुँडा जोतेको गोरुको काँधजस्तो भएको छ

काठमाडौँ। बिहीबार ललितपुरस्तिथ पार्टी कार्यालयमा पार्टी प्रवेश कार्यक्रममा बोल्दै नेकपा एमालेका अध्यक्ष केपी शर्मा ओलीले सत्तारूढ गठबन्धनका नाममा अनाडी मान्छे बसेर राष्ट्रपतिको ‘मजाक’ उडाउने काम गरेको आरोप लगाएका छन् । अध्यक्ष ओलीले नागरिकता विधेयकमा राष्ट्रपतिको सुझावलाई संसद बाहिर अनाडीहरु बसेर मजाक बनाउँदै कुसंस्कार भित्र्याएको समेत बताए । 

उनले संविधान, कानुन र मर्यादा समेत गठबन्धनले उल्लंघन गरेको भन्दै गठबन्धनसँग बहुमत नै नभएको टिप्पणी गरे । ‘जोडेको बहुमतको धाक लगाउने ?’, ओलीको प्रश्न छ ।   उनले यही कुसंस्कार र अलोकतान्त्रिक बाटोमा हिँडेको गठबन्धनले राष्ट्रपतिको अपमान गर्ने काम गरेर महानता ठानेको भन्दै मंसिर ४ को निर्वाचनले दण्डसजाय दिने विश्वास गरे ।

ओलीले भने, ‘गठबन्धनको गन्तव्य जसरी पनि घुँडा टेकेर भएपनि सत्ता प्राप्त गर्नु हो, यसो सुरुवाल तान्न लगाएर हेर्नुस् त कस्तो भएको छ घुँडा टेक्दा टेक्दा ? जोतेको गोरुको काँधजस्तो भएको छ ।’

ओलीले गठबन्धनमा रहेका पार्टीहरू गठबन्धनबाट निस्कन नसक्ने भन्दै कुवामा जसले हाल्यो उसले मात्रै निकाल्न सक्ने बताए । ‘आफै सक्नुहुन्न । अस्तित्व रक्षाको प्रयासमा हुनुहुन्छ । बाँच्न र ज्यान जोगाउन’, माओवादीको नाम लिँदै ओलीले भने, ‘माओवादी पार्टी भनेको पार्टी होइन केन्द्र भनेको छ उसले । माथि मात्रै छ । तल छैन ।’ ओलीले माओवादी केही समयमा ‘फेमेली क्लबमा परिणत हुने दावी गरे ।