राष्ट्रपति भण्डारीबाट संविधानको घोर अपमान भयो : सत्ता गठबन्धन

काठमाडौँ। दुवै सदनले पारित गरेर पठाएको नागरिकता विधेयक दोस्रो पटक पनि राष्ट्रपति विद्यादेवी भण्डारीले फिर्ता पठाए पछि सत्ता गठबन्धनको बैठकले उक्त विधेयक प्रमाणीकरण नगर्ने राष्ट्रपति भण्डारीको कदम संविधानमाथिको घोर अपमान भएको निष्कर्ष निकालेको छ।

प्रधानमन्त्रीको सरकारी निवास बालुवाटारमा आज बिहान बसेको गठबन्धनका शीर्ष नेताको बैठकले राष्ट्रपतिको कदम असंवैधानिक ठहर  गरेको छ।

‘राष्ट्रपतिको यो गैर संवैधानिक कदमबाट जनतले निर्वाचित गरेको संघीय संसदको घोर अपमान र अवमूल्यन भएको छ’ प्रधानमन्त्री एवं कांग्रेस सभापति शेरबहादुर देउवा, माओवादी अध्यक्ष पुष्पकमल दाहाल प्रचण्ड, एकीकृत समाजवादीका अध्यक्ष माधवकुमार नेपाल र जसपा अध्यक्ष उपेन्द्र यादवले जारी गरेको विज्ञप्तिमा भनिएको छ ।

सत्तारुढ गठबन्धनमा रहेको राष्ट्रिय जनमोर्चाले भने संयुक्त विज्ञप्तिमा हस्ताक्षर गरेको छैन ।