निर्वाचन खर्च नबुझाउने १ लाखभन्दा बढी उम्मेदवारमाथि कारबाही 

काठमाडौँ । निर्वाचन आयोगले स्थानीय तहको चुनावमा खर्च विवरण नबुझाउने १ लाख २३ हजार ६२४ जना उम्मेदवारलाई कारबाही गरेको छ । निर्वाचन परिणाम घोषणा भएको मितिले ३० दिनभित्र निर्वाचन खर्च नबुझाउने उम्मेदवारहरुलाई आयोगले आज कारबाही गर्ने निर्णय गरेको हो । 
 
आयोगले निर्वाचन खर्च नबुझाउने महानगरपालिकाका मेयर र उपमेयरका उम्मेदवारलाई साढे ७ लाख रुपैयाँ जरिवाना तिर्न निर्देशन दिएको छ ।  महानगरका वडा सदस्य तथा वडाध्यक्षका उम्मेदवारले  ३ लाख रुपैयाँ जरिवाना दिनुपर्ने आयोगले जनाएको छ । 

आयोगले उपमहानगर पालिकाका मेयर र उपमेयरका उम्मेदवारलाई साढे ५ लाख, वडाध्यक्ष र वडा सदस्य उम्मेदवारले साढे २ लाख, नगरपालिकाका मेयर र उपमेयरका उम्मेदवारलाई साढे ४ लाख, त्यसकै  वडाध्यक्ष र वडा सदस्य उम्मेदवारलाई २ लाख जरिवाना तोकेको छ । 

गाउँपालिकाका अध्यक्ष र उपाध्यक्ष उम्मेदवारले साढे ३ लाख तथा वडा सदस्य र वडाध्यक्षका उम्मेदवारले डेढ लाख रुपैयाँ जरिवाना तिर्नु पर्ने छ । आयोगले जरिवाना नतिर्ने उम्मेदवारलाई ६ वर्षसम्म कुनै पनि चुनावमा भाग लिन नदिने चेतावनी समेत दिएको छ ।