उम्मेदवार सिफारिस भएका सदस्यलाई पत्रकार महासंघले कारवाही गर्ने

काठमाडौँ । आगामी ४ मंसिरमा हुन लागेको प्रतिनिधिसभा र प्रदेशसभा निर्वाचनमा उम्मेदवार सिफारिस भएका पदाधिकारी, सदस्य तथा साधारण सदस्यहरूलाई नेपाल पत्रकार महासंघ बारा शाखाले कारवाही गर्ने भएकाे छ ।  

नेपाल पत्रकार महासंघ बाराले पत्रकार महासंघकाे सदस्यता नत्यागी राजनीतिक दलबाट नै उम्मेदवार सिफारिस भएकोमा आपत्ति जनाएको हाे ।

महासंघ बाराका अध्यक्ष रेशम तिवारीको अध्यक्षतामा शुक्रबार बसेको बठकले सिफारिस भएकाेमा महासंघको ध्यानाकर्ष भएको जनाएको छ । महासंघको विधान २०६० (पाँचौँ संशोधन २०७६)ले प्रष्ट रूपमा ‘महासंघका केन्द्रीय समिति, प्रदेश समिति वा शाखा समितिका पदाधिकारी तथा सदस्यले सो पदमा बहाल रहेसम्म कुनै राजनीतिक दलको कुनै पनि तहको विभाग वा समितिमा रही काम गर्न पाउने छैन’ भनि उल्लेख छ । दलको कुनै पनि तहको विभाग वा समितिमा रही काम गरेमा समितिले निलम्बन गर्ने र सदस्यता खारेज गर्ने निर्णयसमेत गर्न सक्नेतर्फ ध्यान दिन महासंघ बाराले अनुरोध गरेको छ ।