काठमाडौं । अख्तियार दुरुपयोग अनुसन्धान आयोगको कार्यालय टंगालका १५ जना कर्मचारीमा कोरोना संक्रमण पुष्टि भएको छ ।
यसअघि सोही कार्यालयमा कार्यरत एक प्रहरीमा संक्रमण पुष्टि भएपछि उनको सम्पर्कमा आएका सबैको स्वाब संकलन गरी परीक्षण गरिएको थियो । परीक्षणका क्रममा १५ जनामा संक्रमण पुष्टि भएको अख्तियार स्रोतले जानकारी दियो ।
गत आइतबार स्वाब संकलन गरी परीक्षणका लागि पठाइएको थियो । परीक्षणको नतिजा मंगलबार आएको हो ।
यसअघि नै प्रहरी हेर्डक्वार्टरमा कार्यरत प्रहरीहरुमा संक्रमण देखिएको छ । आज संक्रमण पुष्टि भएका कसैमा पनि कोरोनाको लक्षण नदेखिएको बताइएको छ ।
स्वास्थ्य प्रोटोकल अनुसार गरिएको परीक्षणमा १५ संक्रमित भेटिएसँगै उनीहरु सम्पर्कमा आएकाको पनि परीक्षण गर्नुपर्ने भएको छ ।
