आसन्न निर्वाचनको कार्यतालिका सार्वजनिक 

काठमाडौँ । निर्वाचन आयोगले आसन्न निर्वाचनको कार्यतालिका सार्वजनिक गरेको छ । आयोगले आगामी मंसीर ४ गते हुने प्रतिनिधिसभा र प्रदेशसभा सदस्य निर्वाचनका लागि चुनावी कार्यक्रम स्वीकृत गरेको हो । 

विभिन्न राजनीतिक दलले छनोट गरेका उम्मेरवारको असोज २३ गते मनोनयनपत्र दर्ता गर्ने र उम्मेदवारको सुची प्रकाशन गर्ने कार्यक्रम रहेको आयोगले जनाएको छ । यसैगरी असोज २४ गते उम्मेदवारको विरोधमा उजुरी दिने, २४ गतेदेखि २५ गतेसम्म मनोनयनयपत्र र उजुरी उपर जाँचबुझ गरी निर्णय गर्ने कार्यतालिका छ ।  

असोज २५ गते उम्मेदवारको नामावली सार्वजनिक हुनेछ भने २६ गते उम्मेदवारले आफ्नो नाम फिर्ता लिन सक्ने आयोगले बताएको छ । सोही दिन उम्मेदवारको अन्तिम नामावली प्रकाशन र उनीहरुलाई निर्वाचन चिन्ह दिइने कार्यक्रम छ । 

निर्वाचन आयोगले समानुपातिक निर्वाचन प्रणाली तर्फको उम्मेदवारको बन्द सूची बुझाउन असोज २ गतेको समय दिएको छ । उक्त सूचीमा नाम समावेश भएका व्यक्तिले प्रतिनिधिसभा र प्रदेशसभा सदस्य निर्वाचनमा उम्मेदवार हुन नपाउने आयोगले स्पष्ट पारेको छ ।