प्रचण्डले भने- मैले र आरजुले भारतीयसँग सहमति गरेको भनेर चीनमा समेत भ्रम फैलिएछ 

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले आफू र प्रधानमन्त्री शेरबहादुर देउवा पत्नी एवं कांग्रेस नेता आरजु देउवाले भारतमा सहमति गरेको भनेर चीनलाई समेत भ्रम परेको बताएका छन् ।

शुक्रबार पोखरामा आयोजित पत्रकार सम्मेलनमा उनले आफू र प्रधानमन्त्री देउवा पत्नी आरजुले भारतमा समझदारी गरेको भन्नेबारे चिनियाँ अधिकारीहरुले चासो राख्दा आफु अचम्म परेको बताएका हुन्। 

‘मलाई अनौठो त्यतिबेला लाग्यो कि हाम्रो नेपाली राजदूत चीनमा जानुभएको, उहाँले मलाई यहाँ त निकै ठूलो प्रश्न उठ्यो, तपाईं र आरजु भारतीयसँग बसेर कति बुँदे सहमति गर्नुभयो रे भन्ने कुरा चीनले पनि बडो चासो राख्यो भन्दा मलाइ अनौठो लाग्यो’ उनले भने ।

आफू र आफ्नो पार्टीलाई बदनाम गर्ने षड्यन्त्र रचेको प्रचण्डले बताए । ‘त्यो बिलकुल निराधार, बिलकुल झूटो र नियोजित प्रचार गरियो । त्यो चाहिं हाम्रो पार्टीलाई र मलाई अनावश्यक बदनाम गर्ने षड्यन्त्रबाट प्रेरित कुरा हो ।