तर्किएका वामदेव भेट्न प्रचण्ड भैंसेपाटीमा

काठमाडौं । नेपाल कम्युनिष्ट पार्टी (नेकपा) को विवादका कारण समूह सदस्यकाबीच भेट हुने र छुटिने क्रम जारी छ । कुनै बेला प्रधानमन्त्री केपी शर्मा ओली विरुद्धको समूहमा दह्रो साथ उभिएका वामदेव गौतम अहिले विरोधी समूहसँग तर्किएर बसेका छन् ।

अध्यक्ष पुष्पकमल दाहाल समूहको भेलामा समेत उपस्थित हुन छोडेका वामदेव अहिले अधिकांश समय आफ्नै निवासमा बिताइरहेका छन् । मंगलबार भने वामदेवलाई भेट्न प्रचण्ड उनको निवास नै पुगेका छन् । गत साता ६ बुँदे प्रस्ताव सार्वजनिक गरेपछि नै वामदेवलाई ओली समूहमा लागेको आरोप लागिरहेको छ । 

पछिल्लो समय प्रम ओली र प्रचण्डबीचको टसलमा वामदेवको भूमिकालाई एक हदसम्मको निर्णायक भनिएको छ । यस्तोमा आजको भेटलाई राजनीतिक रुपमा चासोको रुपमा हेरिएको छ । 

आज साँझ प्रम ओली र प्रचण्डबीच छलफल हुने तय छ । सोमबारको वार्ता केही सकारात्मक भएको भनिएपनि आजको छलफललाई बढी महत्वका साथ हेरिएको छ । 

यतिबेला प्रचण्ड समूह आफ्ना भनाइ लिएर स्थायी समितिमा जानुपर्ने लाइनमा छन् भने प्रम ओली भने पहिला सहमति गरेर मात्रै स्थायी समिति पुन: सञ्चालन गर्नुपर्नेमा अडिग छन् । 

यही विषयमा नै कुरा गर्नका लागि प्रचण्ड आज वामदेव निवास गएको बालुवाटार स्रोतको दावी छ । 

वामदेवले अब आफू कुनै समूहको भेलामा नजाने भनेकाले प्रचण्ड स्वयं नै उनीलाई भेट्न गएको बुझिएको छ । यसअघि गत साता प्रम ओली आफ्नो परिवारसहित वामदेव निवास पुगेका थिए ।