काठमाडौं । सशस्त्र प्रहरी बलका पूर्वडीआइजी चिरन्जीवी अधिकारीसहितका ब्यक्तिको पैसा सापटीलिएर नतिर्ने एक टिपर ब्यवसायी जीतबहादुर गुरुङ जेल चलान भएका छन् । बुटवलका जीतबहादुर गुरुङ सिमेन्ट उद्योगको चुनढुंगा लगायतका सामान ढुवानी गर्ने टिपर ब्यवसायी हुन् ।
जीत सप्लायर्स नामक कम्पनीका संचालक गुरुङले राजेशकुमार श्रेष्ठसँग ७६ लाख रुपैयाँ, सशस्त्रका पूर्वडीआइजी चिरन्जीवी अधिकारीको २४ लाख रुपैयाँ, अच्यूत पोखरेलसँग ६५ लाख र कार्की थरका नेपाली सेनाका एक पूर्व कर्णेलको २५ लाख रुपैयाँ सापटी लिएका थिए । तर गुरुङले पैसा नतिरेपछि पैसा सापटी दिनेहरु प्रहरी गुहार्न पु्गे । गुरुङले एनआइसी एसिया बैंकको नाममा चेक दिए पनि खातामा पैसा नभएको पाइएपछि सापटी दिने राजेश श्रेष्ठसहितका पीडितहरुले प्रहरीमा उजुरी हाल्न पुगेका थिए ।
पैसा सापटी लिएका गुरुङले चेक दिएर आलटाल गर्दैआएका थिए । श्रेष्ठ, अधिकारी, सापकोटाले चेक नसाटिएपछि प्रहरीमा उजुरी दिए । बाउन्स गरिएका चेक सहित उजुरी दिएपछि काठमाडौंको प्रहरी बृत्त सिंहदरवारले गुरुङलाई केही दिनअघि पक्राउ गरेको थियो । प्रहरीले अदालतमा मुद्दा दायर गरेपछि धरौटी राख्न नसकेकाले गुरुङ सोमबार केन्द्रीय कारागार डिल्लीबजारमा थुनामा गएका छन् ।
