विधायन समितिद्वारा पारित नागरिकता विधेयक राष्ट्रिय सभामा पेस

काठमाडौं। विधायन व्यवस्थापन समितिद्वारा बहुमतले पारित भएको नागरिकता ऐन संशोधन गर्न बनेको नेपाल नागरिकता (पहिलो संशोधन) विधेयक २०७९  समितिले राष्ट्रिय सभामा पेस गरिएको छ । 

बुधबार विधायन समितिले बहुमतले पारित गरेको उक्त नागरिकता विधेयकसम्बन्धी प्रतिवेदन बिहीबार बसेको राष्ट्रिाय सभामा समितिका ज्येष्ठ सदस्य नारायणदत्त मिश्रले पेस गरेका हुन् । 

दुवै सदनले पारित गरी प्रमाणीकरणका लागि आएको उक्त विधेयकलाई राष्ट्रपति विद्यादेवी भण्डारीले केही विषयमा संशोधनको आवश्यकता औंल्याउँदै सुझाव र सन्देशसहित फिर्ता पठाएकी थिइन् । 

यसपछि बसेको प्रतिनिधिसभा बैठकले विना संशोधन जस्ताको तस्तै उक्त विधेयक पारित गरिसकेको छ । प्रतिनिधिसभाले पारित गरेर सन्देशसहित राष्ट्रिय सभामा पठाइएको थियो ।

राष्ट्रिय सभाले विधायन व्यवस्थापन समितिमा छलफलका लागि पठाएको थियो र उक्त विधेयक विधायन समितिले पनि विना संशोधन पारित गरी राष्ट्रिय सभामा पेस गरेको हो ।