चोलेन्द्रशमशेरबिरुद्धको महाभियोग प्रस्ताव अगाडि बढाउन माग 

काठमाडौं । नेपाल बार एशोसिएसनले ६ महिनाअघि दर्ता भएको निलम्बित प्रधानन्यायाधीश चोलेन्द्रशमशेर जबराविरुद्धको महाभियोग प्रस्ताव तत्काल अगाडि बढाउन माग गरेको छ ।

बारका पदाधिकारीको टोलीले सोमबार सभामुख अग्निप्रसाद सापकोटालाई भेटेर राणाविरुद्धको महाअभियोग अघि बढाउन आग्रह गरेको हो ।

प्रतिनिधिसभामा विचाराधीन रहेको जबराविरुद्धको महाअभियोग प्रस्ताव लामो समयसम्म अघि बढ्न नसकेपछि बारको टोली सिंहदरवार पुगेको हो । बार एशोसिएसनकी महासचिव अञ्जिता खनालले चालु अधिवेशनबाट नै प्रधानन्यायाधीश जबराविरुद्धको महाअभियोगको छिनोफानो गर्ने गरी प्रक्रिया अघि बढाउन आग्रह गर्नका लागि बारको टोली सभामुख सापकोटासमक्ष पुगेको जानकारी दिएकी छन् ।

जबराविरुद्ध सत्तारुढ नेपाली कांग्रेस र नेकपा माओवादी केन्द्रका ९८ सांसदले गएको फागुन १ मा संसद सचिवालयमा महाअभियोग प्रस्ताव दर्ता गराएका थिए । फागुन २३ मा प्रतिनिधिसभाको बैठकले महाअभियोग सिफारिस समिति बनाएको थियो । त्यो समिति बने पनि बैठक एकपटक पनि बसेको छैन ।

संसदले सो महाअभियोग प्रस्तावका बारेमा थप कुनै कारबाही प्रक्रिया बढाएको छैन । महाअभियोग प्रस्ताव दर्ता भएलगत्तै प्रधानन्यायाधीस राणा ६ महिनादेखि निलम्बनको अवस्थामा छन् । महाभियोग दर्ता भएपछि स्वतः निलम्बन भएका राणाले बालुवाटारस्थित प्रधानन्यायाधीशको सरकारी निवास छाडेका छैनन् ।

सर्वोच्चदेखि तीनै तहका अदालतका मुद्दामा करोडौं मोलमोलाई गर्ने र अनेक विवादित फैसला गरेका प्रधानन्यायाधीश राणामाथि महाभियोग दर्ता गरिएको थियो ।