औषधि विभागको भद्रगोलमा अख्तियार रमिते, घुस पचाउन विदेशी उद्योगहरुको निरीक्षणका लागि टोली परिचालन

काठमाडौं । औषधि ब्यवस्था विभागले विदेशी औषधि उद्योगहरुको निरीक्षण आइतबारदेखि सुरु गर्ने भएको छ । ३ सय ४० वटा उद्योगहरुले निरीक्षणका लागि विभागसमक्ष निवेदन दिएका थिए । तर विभागले स्वार्थ र मोटो रकम लिएर ५८ वटा उद्योगहरुलाई मात्रै निरीक्षण सूचीमा समेटेको छ । जसको सर्वत्र बिरोध भइरहेको छ । लामो समयदेखि निरीक्षणको पर्खाईमा रहेका उद्योगहरु सूचीमा नपरेपछि आक्रोशित हुन पुगेका छन् । उनीहरुले स्वास्थ्य तथा जनसंख्या मन्त्रालय, अख्तियार दुरुपयोग अनुसन्धान आयोग लगायतका निकायहरुमा न्यायका लागि उजुरी दिएका छन् । 

अख्तियारले यो बिषयलाई लिएर सुक्ष्मरुपमा अध्ययन गर्न थालेको जानकारी पाएपछि विभागका अधिकारी निरीक्षणमा जान हतारिएका हुन् । आइतबार निरीक्षण कार्य सुरु हुने र सोको नेतृत्व निरीक्षण महाशाखाका प्रमुख सन्तोष केसीले गर्ने विभाग स्रोतले बताएको छ । उनको नेतृत्वमा करिब ७ जनाको टोली निरीक्षणमा जाँदैछ । असारको अन्तिममा हुन लागेको यो निरीक्षण हतारमा सरकारी बजेट पचाउने र निरीक्षण सूचीमा हाल्दा कबोल गरेको रकम उठाउने लक्ष्य बिभागका अधिकारीले राखेका छन् ।

विभागका महानिर्देशक भरत भट्टराई र निर्देशक सन्तोष केसीको अगुवाइमा भएको रकम उठाउने कार्यको संचारमाध्यममार्फत् सार्वजनिक भएपछि सर्वत्र आलोचना भइरहेको छ । महानिर्देशक भट्टराई पछिल्लो समय सिटामोलको मूल्यबृद्धि, विदेशी औषधि कम्पनीहरुबाट उत्पादित औषधिहरुको मूल्य बढाउनका लागि राखेको प्रस्तावमा सहमति दिएपछि विवादमा त तानिएकै थिए, त्यसमाथि अहिले निरीक्षण सूची सार्वजनिक गर्दा मोटो रकम असुलेकोमा झनै विवादमा परेका छन् ।

काम नगरे पनि हप्कीदप्की गर्न पछि नपरेका बिरोध खतिवडा मन्त्री पदबाट हटेपछि सन्तोषको सास फेरेका भट्टराई अहिले अहिलेका स्वास्थ्य मन्त्री भवानीप्रसाद खापुङ तेह्रथुमकै भएपछि झन हौसिएका छन् । उनले आफू तेह्रथुमे भट्टराई भएको र मन्त्री पनि उतैका भएपछि आफूलाई अब कसैले हटाउन नसक्ने भन्दै कार्यकक्षमै कर्मचारीहरुसँग फूर्ति देखाउन थालेका छन् ।

विगतमा ताप्लेजुङका योेगेश भट्टराई पर्यटन मन्त्री हुँदा पनि आफू ताप्लेजुङकै भट्टराई भन्दै एमालेसँग साइनो गाँसेर स्वास्थ्य मन्त्री भानुभक्त ढकाललाई प्रभावमा पार्न सफल भएका थिए । ढकालले उनको समेत सिफारिसमा भरत भट्टराईलाई महानिर्देशक बनाएको चर्चा अहिले पनि हुने गरेको छ ।

प्रदेश १ का जुन जिल्लाका मन्त्री भए, तिनैको निकट भएको बताउने उनको यो घटिया कलालाई नचिन्दा मन्त्रीहरु गुमराहमा पर्दैैआएका छनु । कांग्रेसका मन्त्री भएका बेला सोही पार्टीका कार्यकक्षमा बसाएर बीपी, गणेशमान र किस्ुनजीको सिद्धान्तको ब्याख्या गर्न पछि नपर्ने भट्टराई एमाले र समाजवादी मन्त्री हुँदा कम्युनिष्ट नेताको बखान गर्न पनि उत्तिकै सिपालु छन् । 

बिराटनगर निवासी भट्टराई राजधानीमा भने ललितपुरको इमाडोलमा बस्दैआएका छन् । भट्टराईले आफ्नै आसपास सातदोबाटोमा रहेको एक पार्टी प्यालेसलाई रकम कारोबारको अड्डा बनाउँदैआएको आरोप छ । सो अड्डामा बानेश्वर निवासी निर्देशक सन्तोष केसी आक्कलझुक्कल पुग्ने गरेको स्रोतको दाबी छ । आफ्ना बिरोधीलाई विभाग प्रांगणबाटै लखेटेर एकछत्र राज गर्दैआएका भट्टराई–केसी गठबन्धनलाई साथ नदिने कुनै पनि कर्मचारी विभागमा टिक्नै नसक्ने अवस्था सृजना गरिएको छ । यहीकारण जागिर अवधि बाँकी हुँदाहुँदै निर्देशक सरहकै पदमा कार्यरत शिव भट्टराई राजीनामा दिन बाध्य भएका थिए ।

भट्टराई–केसीको अनुचित दबाब झेल्न नसकेर र उनीहरुको कुकृत्यको साक्षी बस्न इन्कार गरेकै कारण भट्टराईले जागिर छाड्न बाध्य भएको विभागमा चर्चा छ । अनुमति महाशाखामा लामो समय बसेर स्थानीय तहको चुनावअगाडि निरीक्षण महाशाखाको प्रमुख बन्न सफल भएका केसी दर्जनभन्दा बढी ठूला स्थायी बिचौलिया मार्फत् परिचालन हुँदैआएको भट्टराई निकट स्रोतले दाबी गरेको छ । स्वार्थमा आधारित यो गठबन्धन बाहिर एक्लाएक्लै हुँदा भने एक अर्काको उछित्तो काढ्न पछि पर्दैनन् ।