कार चेक गर्दा पेस्तोल बरामद, तीन भारतीय पक्राउ

जनकपुरधाम । सशस्त्र प्रहरीको टोलीले धनुषाको विदेह नगरपालिका वडा नं. १ महिनाथपुरस्थित सीमानाकामा कार चेक गर्ने क्रममा पेस्तोल बरामद गरेको छ ।

महिनाथपुरको सीमानाकाबाट भारततर्फ जाँदै गरेको बीआरओ ६ एपी ३००८ नम्बरको सुजुकी कार चेकजाँच गर्दा गाडीको सीटमुनि मेड इन युएसए लेखिएको ७.६५ एमएमको १ थान गोली लोड गरेको पेस्तोल फेलापारेको थियो । 

सशस्त्र प्रहरी निरीक्षक दिलेन्द्र खत्रीको कमाण्डमा खटिएको टोलीले सोमबार उक्त कारबाट पेस्तोल बरामद गरेको हो । उक्त टोलीले उक्त कारसहित बरामद पेस्तोल इलाका प्रहरी कार्यालय खजुरीमा पठाइएको जानकारी प्राप्त भएको छ ।

पेस्तोल सहित पक्राउ पर्नेहरुमा भारत बिहार मुजफरपुर–७ साहेबगंज बस्ने बर्ष २९ का रोहुल रंजन, बर्ष २० का उज्वलकुमार र बर्ष २६ का संजयकुमार छन् ।