गम्भीर आराेप लागेपछि सशस्त्रका एसएसपी फरार

काठमाडौ । बलात्कारकाे आराेप लागेपछि शसस्त्र प्रहरीका एसएसपी फरार भएका छन् ।

सशस्त्र प्रहरी बल नेपाल हुल तथा दंगा व्यवस्था तालिम शिक्षालय लामापाटन पोखरामा कार्यरत एसएसपी राजेन्द्र अधिकारीमाथि बलात्कारको आरोप लागेको हाे ।

उनले भरतपुर बस्‍ने एक महिलालाई आफ्नै कार्यलयमा लगेर बलात्कार गरेको महिलाले आराेप लगाएकी छिन् ।

एसएसपी अधिकारीले आफुलाई लठ्याउने औषधि प्रयोग गरेर बलात्कार गरेको भन्दै पीडित महिलाले प्रहरी कन्ट्रोललाई फोन गरी उजुरी दिएकाे बताइएकाे छ ।

घटनाबारे थप अनुसन्धान गर्न प्रहरी घटनास्थलमा पुगेको छ । घटनाकाे उजुरी परेकाे थाहा पाएसँगै एसएसपी अधिकारी फरार रहेको प्रहरीले जनाएको छ ।