काठमाडौं । नेपालमा रहेको सलह कीराको झुण्ड रोल्पा, रुकुम, रुकुम पश्चिम हुँदै सल्यान जाने सक्ने प्लान्ट क्वरेन्टिन तथा विषादी व्यवस्थापन केन्द्रले जनाएको छ ।
आइतबार प्युठानको स्वर्गद्वारी नगरपालिका आसपासको क्षेत्रमा बसेको सलहको झुण्ड गएराति रोल्पा र प्युठानको बीचमा बसेको केन्द्रको भनाई छ । केन्द्रका प्रमुख सहदेव हुमागाईंका अनुसार यो सलहको झुण्ड आज घाम लागे रोल्पा, रुकुम, रुकुम पश्चिम हुँदै सल्यान जाने सम्भावना छ ।
यसलाई बालीमा बस्न नदिन ढ्याङग्रो ठोक्ने, थाल बजाउने, धुँवा बाल्ने लगायत ठूलो आवाज निकाल्न सुझाव दिइएकाे छ । ठूलो आवाज निकाल्दा सलहको झुण्ड छिन्नभिन्न हुने प्लान्ट क्वरेण्टीन तथा विषादी व्यवस्थापन केन्द्रका प्रमुख हुमागाईंको भनाई छ ।
यस्तै यो झुण्ड बाहिरिए पनि अर्को झुण्ड पर्साको वीरगन्ज हुँदै नेपाल पस्ने देखिएकाले सतर्क रहन आग्रह गरिएकाे छ ।
