वीपीको ३८औं स्मृति दिवसमा बाढी पीडित तथा क्वारेन्टिन बसेकालाई सहयोग गरी मनाइने

काठमाडौं । वीपी कोइरालाको ३८औं स्मृति दिवसमा नेपाली कांग्रेस निकट नेपाल तरुण दलले बाढी पहिरोबाट पीडित भएका र क्वारेन्टिनमा बसेकाहरुको सेवा गरेर मनाउने भएको छ ।

वीपीको ३८औं स्मृति दिवस आउने साउन ६ गते हो । तरुण दलका केन्द्रीय अध्यक्ष जीतजंग बस्नेतका अनुसार तरुण दल केन्द्रीय समितिले साप्ताहिक रुपमा विभिन्न रचनात्मक एवं सृजनात्मक कार्यक्रमहरु गरी मनाउने निर्णय गरेको छ । साथै जिल्ला समितिहरुलाई पनि त्यसैगरी मनाउन र त्यसको जानकारी केन्द्रमा गराउन परिपत्र गरिएको छ ।

वीपी स्मृति दिवसमा वृक्षारोपण, रक्तदान, फलफूल वितरण, अन्तरक्रियालगायतका कार्यक्रम गर्ने, कोरोना प्रभावित जिल्लाका क्वारेन्टाइनहरुमा सरसफाइ गर्ने, बाढी पहिरो पीडित जनतालाई सहायता वितरण, उद्धार र पुनःस्थापनामा कृयाशील रहन तरुण दलले सबै जिल्ला समितिहरुमा परिपत्र गरेको छ ।