जसपाकाे दल दर्ता नम्बर १५९, आयाेगले दियाे प्रमाणपत्र

काठमाडौं । निर्वाचन आयाेगले नयाँ दर्ता भएकाे जनता समाजवादी पार्टीलाई दल दर्ताको प्रमाणपत्र दिएकाे छ । मधेस केन्द्रित दुई दल राष्ट्रिय जनता पार्टी र समाजवादी पार्टी मिलेर बनेको जनता समाजवादी पार्टी (जसपा) ले याे सँगै एकीकृत दलकाे वैधानिकता पाएको छ । जसपाको दर्ता नम्बर १५९ रहेकाे छ ।

वैशाख १० गते समाजवादी पार्टी र राष्ट्रिय जनता पार्टीबीच एकीकरण भएको थियो ।  जसपाले जेठ २५ गते दल दर्ताका लागि निर्वाचन आयोगमा निवेदन दिएको थियो । 

पार्टीले आयोगमा बुझाएको नामअनुसार  महन्थ ठाकुर र उपेन्द्र यादव पार्टीको केन्द्रीय कार्यकारिणी समिति अध्यक्ष रहेका छन् भने ३० सदस्यीय कार्यकारिणी सदस्य घोषणा गरिएको छ। 

जसपा आयोगमा दर्ता भएसँगै संसदीय दल पनि अब एउटै हुनेछ । निर्वाचन आयोगले संसदमा रहेका दुई दल एक भएको प्रमाणपत्र पाइसकेकाले याे सूचना आयोगले राजपत्रमा प्रकाशित गर्नेछ । निर्वाचन आयोगले राजपत्रमा सूचना प्रकाशित गरेपछि संसदीय दललाई पत्र पठाउने बताइएकाे छ ।