काठमाडौं । पार्टीकाे ह्वीप उल्लंघन गरेकाे आराेपमा सांसद सरिता गिरीलाई कारबाही गर्न सिफारिस गरिएकाे छ । समाजवादी पार्टीको कार्यदलले उनलाई कारबाही गर्न सिफारिस गरेको हो । गिरीलाई सांसद र पार्टीबाट निष्कासन गर्न सिफारिस गरिएकाे छ ।
लिपुलेक, लिम्पियाधुरा समेटिएको नेपालको नक्सासहितको निसान छाप बदल्नका लागि भएको संविधान संशोधनमा सांसद गिरीले पार्टी ह्वीप उल्लंघन गरेकी थिइन्। नेपालको नयाँ नक्सा जारी हुँदा उनले संसद समेत बहिस्कार गरेकी थिइन् ।
सो विषयमा छानबिन गर्न समाजवादी पार्टीले पार्टी महासचिव रामसहायप्रसाद यादवको संयोजकत्वमा कार्यदल बनाएको थियो। कार्यदलमा मोहम्मद इस्तियाक राई र सुशीला श्रेष्ठ सदस्य थिए। यादव नेतृत्वको कार्यदलले गिरीलाई कारबाहीको सिफारिसका लागि पार्टी केन्द्रीय कार्यालयलाई सिफारिस गरेको छ।
कार्यदलको सिफारिसबारे समाजवादी पार्टीको पदाधिकारी बैठकमा छलफल हुँदैछ । कार्यदलको सिफारिस अनुसार पार्टीले कारबाही गरेमा सांसद गिरीको सांसद पद र पार्टी सदस्यता गुम्ने भएको छ ।
