बालुवाटार भेलालाई काउन्टर दिन झम्सिखेल जमघट

काठमाडौं । बुधबार बिहान प्रधानमन्त्री तथा नेकपाका अध्यक्ष केपी शर्माओलीले बालुवाटारमा आफूनिकट नेता र मन्त्रीहरुलाई बोलाएर आफूलाई घेराबन्दीमा पारिएको भन्दै सहयोग गर्न आग्रह गरेपछि साँझ अर्का अध्यक्ष पुष्पकमल दाहाल ‘प्रचण्ड’, उपाध्यक्ष वामदेव गौतम, बरिष्ठ नेता माधवकुमार नेपालसहितका ३० स्थायी समिति भेला भएका छन् ।

४४ सदस्यीय स्थायी समितिमा ३१ सदस्यले प्रधानमन्त्री ओलीले दुवै पद छाड्नुपर्ने मागप्रति समर्थन जनाएका छन् ।  उक्त भेलामा उपस्थित नभए पनि पर्यटन मन्त्री योगेश भट्टराईले निर्णयप्रति समर्थन जनाएको बताइएको छ ।

प्रधानमन्त्री ओलीले पार्टीको निर्णय मान्नु भन्दा पनि बालुवाटारमा गुटको बैठक राखेर चुनौती दिएकाले झम्सीखेलमा भेला राखेको तर्क प्रचण्ड र माधव नेपालनिकट स्थायीसमिति सदस्यहरुको भनाइ छ । प्रचण्ड र माधव नेपालसतिका शीर्षनेताहरु सहमतिकै आधारमा निर्णय गर्ने तर त्यो सहमति हुन नसके बहुमतका आधारमा निर्णय गरेर अगाडि बढ्ने पक्षमा पुगेको छ ।

झम्सिखेलको एक रेष्टुरेन्टमा बसेको बैठकले अब प्रधानमन्त्री एवं पार्टी अध्यक्ष ओली पार्टी निर्णय मान्न तयार भए मात्र उनीसँग वार्ता र छलफल गर्ने निर्णय गरेको स्रोतले बताएको छ ।