विप्लव समूहका ६ जना कार्यकर्ता पक्राउ

कैलाली । प्रतिबन्धित नेत्रविक्रम चन्द नेतृत्वको नेपाल कम्युनिष्ट पार्टी विप्लव समूहका ६ जनालाई प्रहरीले कैलालीबाट पक्राउ गरेको छ।

प्रहरीले धनगढी उप–महानगरपालीका वडा नम्बर ९ बस्ने जिल्लाका जनसरकार प्रमुख ४८ का दल बहादुर बिकसहित ६ जनालाई शनिबार राति पक्राउ गरेको हो।

विभिन्न मितिमा आपराधिक क्रियाकलापमा संलग्न रही फरार भएका बिकलाई प्रहरीले वडा नम्बर १२ जुगेडामा फेला पारेको थियो। उनीमाथि राजद्रोह, कर्तव्य ज्यान, हातहतियार खरखजाना, विस्फोटक पदार्थ तथा संगठित अपराधको आरोप रहेको प्रहरीको दावी छ।

‘कसैको श्रद्धाञ्जलीको कार्यक्रममा जाँदै थिए भन्ने खबर आएको थियो। त्यसैक्रममा हामी पक्राउ गर्न गयौं,’ प्रवक्ता तथा प्रहरी निरीक्षक हिक्मत बहादुर थापाले भने।

उनलाई पक्राउ गर्न खोज्दा उनीसँग रहेका अन्यले प्रहरीमाथि नै अभद्र व्यवहार गरेको र भगाउन खोजेपछि अन्य पाँच जनालाई पनि पक्राउ गरेको जिल्ला प्रहरी कार्यालय कैलालीले जनाएको छ।

प्रहरीले २२ वर्षीय लक्की शाह, जिल्ला कमिटीका सदस्य ४० वर्षीय डम्बर सुनार, वर्तमान अखिल क्रान्तिकारीका अध्यक्ष २५ वर्षीय सुवास जोशी, धनगढी उपमहानगरपालिकाका इन्चार्ज ३० वर्षीय प्रकाश रावल र जिल्ला कमिटी बझाङका सदस्य ३० वर्षीय बवरजंग सिंह छन्।

उनीहरूमाथि प्रहरीले थप अनुसन्धान थालेको प्रहरी कार्यालय कैलालीले जनाएको छ।