पर्यटनमन्त्री आले चढेको गाडी दुर्घटना, गाडीमा सवार सबै सकुशल

काठमाडौं । संस्कृति, पर्यटन तथा नागरिक उड्डयन मन्त्री प्रेमबहादुर आले चढेको गाडी दुर्घटनामा परेको छ । कैलालीको गेटामा उनी सवार गाडी दुर्घटनामा परेको हो ।

मंगलबार  महेन्द्रनगर बिमानस्थलको सिलान्यास गर्न धनगढी बिमानस्थलबाट आइरहेको अबस्थामा गेटा विमानस्थलभित्र छिर्ने चौकमा पुगेका बेला पवन कडायतले हाँकेको बा ४ च १३७७ नम्बरको उच्च गतिमा अनियन्त्रित ढङ्गले चलाएको कारले मन्त्री आले चढेको गाडीलाई ठक्कर दिएको छ । आलेका स्वकीय सचिव हेमन्त रेग्मीले कडायतले चलाएको गाडीले मन्त्रीको गाडीलाई ठक्कर दिएको बताए ।  

मन्त्री आले चढेको सु.प.प्र. ०१–००१ झ ३३३ गाडीलाई बा ४ च १३७७ नम्बरको गाडिले ठक्कर दिएको जिल्ला प्रहरी कार्यालय कैलालीका एसपी विश्व अधिकारीले पुष्टि गरेका छन् । धनगढी विमानस्थलबाट मेन रोड क्रस गर्दै गरेको अवस्थामा आलेको गाडीलाई सो गाडीले ठक्कर दिएको उनले जानकारी दिए ।

ठक्कर दिने गाडीमा सवार सबै सकुशल जनाइएको छ । दुर्घटनामा मन्त्री आले सवार गाडीको अगाडिको भागमा क्षति पुगेको छ । मन्त्री आले भने सकुशल रहेको र उनी आफ्नो गन्तव्यतर्फ लागिसकेको एसपी अधिकारीले जानकारी दिए ।

गाडी चालकलाई प्रहरीले नियन्त्रणमा लिएको  छ ।