एमालेबाट बिद्रोह गर्ने क्रम जारी, पाल्पाका पूर्वअध्यक्ष रायमाझी नेकपा समाजवादीमा प्रवेश 

बुटवल । खड्गप्रसाद शर्मा ओली नेतृत्वको एमालेमा दुर्गा प्रसाई, कोमल ओली, बालकृष्ण ढुंगेल, प्रभु साहजस्ता विवादित पात्रहरुको हालीमुहाली बढेसँगै इमान्दार नेता कार्यकताले त्यो पार्टीबाट बिद्रोह गर्ने बढिरहेको छ । एमाले बनाउन लामो समयदेखि योगदान गरेका नेताहरुको अपमानको शृंखला बढ्दै जान थालेपछि पाल्पा एमालेका पूर्वजिल्ला अध्यक्ष एवं पूर्वसांसद यादवबहादुर रायमाझी नेकपा (एकीकृत समाजवादी) मा प्रवेश गरेका छन् ।  

शनिबार रायमाझी तानसेनमा पत्रकार सम्मेलन गरी एकीकृत समाजवादीमा प्रवेश गरेका छन् । एमालेमा विधिबिधान भन्दा पनि ओलीको अधिनायकवाद हावी हुँदै जान थालेपछि नेता कार्यकर्ताहरु नेकपा समाजवादीमा प्रवेश गर्ने क्रम बढेको हो । पार्टी प्रवेश कार्यक्रममा रायमाझीले ओलीमा बिधि बिधान भन्दा पनि अधिनायकवादी सोच हावी भएकाले पार्टी छाड्नुपरेको बताएका छन् ।

रायमाझीले एकीकृत समाजवादीले दिने जिम्मेवारी इमान्दारिपूर्वक निभाउने बताएका छन् । पाल्पामा एमालेको दुई कार्यकाल अध्यक्ष रहेका रायमाझी तत्कालीन नेकपामा विवाद हुँदा माधव नेपाल–प्रचण्ड पक्षमा थिए । तर, एमाले विभाजनपछि भने उनी एमालेमै रहेका थिए । 
रायमाझीसँगै एमाले जिल्ला कमिटी सदस्यहरु धनबहादुर रायमाझी, देवीप्रसाद पौडेल, महेश बरालसहितका नेता कार्यकर्ताहरु नेकपा समाजवादीमा प्रवेश गरेका छन् ।

देशभरका एमाले नेता कार्यकर्ताहरुले बिद्रोह गर्ने क्रम जारी रहेको छ । सिन्धुपाल्चोकका एमालेका नेता सुवास कर्माचार्य नेकपा एकीकृत समाजवादीमा प्रवेश गरिसकेका छन् । सुनसरीका पूर्वइन्चार्ज धर्म निरौलाले एमालेको अन्यायका बिरुद्ध बिद्रोह गरिसकेका छन् ।  भानुभक्त जैशी, डा. तारा जोशीपछि आज रायमाझीले एमालेबाट बिद्रोह गरेका छन् । सिन्धुपाल्चोकबाट अरु धेरै नेता कार्यकर्ताहरु एमालेबाट बिद्रोह गर्ने तयारीमा छन् । झापा आन्दोलनका योद्धा नरेश खरेल, सांसद पवित्रा निरौला खरेललाई पनि एमालेले पार्टीबाट अलग नै हुनेगरी अपमान गरेको छ ।