अंगीकृत नागरिकताको सवालमा गगन थापा किन चुप ?

काठमाडौं । सानातिना समस्यामा पनि सामाजिक संजालमा भाइरल हुने र संसदमा बोलिहाल्ने सेलिब्रेटी सांसद गगन थापा वैवाहिक अंगीकृत नागरिकताको सवालमा मौन छन् । विदेशी बुहारीले विवाह गरेको ७ बर्षपछि मात्र वैवाहिक अंगीकृत नागरिकता प्राप्त गर्ने निर्णय राज्यब्यवस्था समितिले गरिसकेको छ । जसमा नेपाली कांग्रेसले फरकमत राखेको छ ।

नेपाली कांग्रेसले नागरिकता ऐन २०६३ अनुसार नै विवाह गर्नासाथ विदेशी बुहारीले अंगीकृत नागरिकता प्राप्त गर्ने ब्यवस्था कायमै राख्नुपर्ने पक्षमा मत राखेको छ । जनता समाजवादी पार्टीले पनि २०६३ कै ऐन अनुसार नागरिकता दिनुपर्ने पक्षमा मत राखेको छ ।

राप्रपाका अध्यक्ष कमल थापाले समेत वैवाहिक अंगीकृत नागरिकताका सवालमा राज्यब्यवस्था समितिको निर्णयलाई सही ठहर्याउँदै नेपाली कांग्रेसले त्यसमा फरक मत राखेकोमा आश्चर्य प्रकट गरेका छन् । तर पूर्व स्वास्थ्य मन्त्री गगन थापा मौन छन् ।

भारतमा विदेशी बुहारीलाई नागरिकता लिन अति कठिन छ । विवाह गरेको ७ बर्षपछि पनि धेरै प्रक्रिया पार गरेपछि मात्र भारतमा आधार कार्ड दिने गरिन्छ । सोनिया गान्धीलाई स्व. राजीव गान्धीसँग विवाह गरेको ३५ बर्षपछि उनको पार्टीले बहुमत ल्याएर प्रधानमन्त्री हुनलाग्दा भारतीय जनता पार्टीले विदेशी नागरिक भनेर बिरोध गर्यो । त्यसपछि ब्याक भएर उनले मनमोहन सिंहलाई प्रधानमन्त्रीका रुपमा अगाडि सारिन् । तर नेपालमा भने विवाह गर्नासाथ नागरिकता दिने प्रचलनमात्र होइन, तिनै महिलाहरु राजनीतिमा सांसद र मन्त्रीसमेत भएका छन् ।

सांसद र मन्त्री नेपालको भएर भारतको पक्षमा बोल्ने गरेको देखिएको छ । पछिल्लो दृष्टान्त सरिता गिरी हुन् । उनी नेपालीसँग विवाह गरेकी भारतीय चेली हुन् । तर लिम्पियाधुरा, लिपुलेक र कालापानीको भूमि भारतले मिच्दा उनी नेपालको विपक्षमा खडा भइन् । संसद एकढिक्का भएर नेपाली भूभाग समेटिएको नक्सा पारित गर्दा उनी त्यो भूमि नेपालकै होइन भन्ने राष्ट्रघाती कित्तामा देखिइन् ।