सांसद विकास कोषमा दिएको पैसा खर्च नभए कोरोना कोषमा जम्मा गरिने

काठमाडौँ । आर्थिक वर्ष २०७६-७७ मा सांसदहरुलाई दिएको पैसा खर्च नभएको खण्डमा सरकारले कोरोना कोषमा जम्मा गर्नेगरी नियमावली संशोधन गरेको छ ।

सरकारका प्रवक्ता डा.युवराज खतिवडाका अनुसार असार २ गते बसेको मन्त्रिपरिषद बैठकले सांसद विकास कोषबाट खर्च नभएको रकम सम्वन्धित स्थानीय तह (आयोजना सञ्चालन भएका स्थानीय तह) को कोरोना कोषमा असार १५ सम्म जम्मा गर्नेगरी नियमावली संशोधन गरिएको हो ।

‘यसरी जम्मा भएको पैसा प्रचलित कानुनबमोजिम कोरोनाको उपचार, नियन्त्रण र रोकथाममा मात्र खर्च गर्न पाइने छ,’ खतिवडाले भने ‘यसले कोभिड १९ नियन्त्रणका लागि आवश्यक स्रोतको अभाव हुन दिने छैन ।’

चालु आर्थिक वर्षमा निर्वाचित एक सांसदले आफ्नो क्षेत्रमा ६ करोड रुपैयाँ विकास खर्च गर्न सक्नेगरी विनियोजन गरिएको थियो । चैत ११ गतेदेखि भएको लकडाउनका कारण सांसदहरुको यो रकम पूर्ण रुपमा खर्च हुनसकेको छैन ।

कोरोना महामारीका कारण आगामी बर्ष सांसद विकास कोषको रकम नछुट्याउन चौतर्फी दबाब परे पनि सरकारले एक क्षेत्रबराबर ४ करोड रुपैयाँ विनियोजन गर्नेगरी बजेट ल्याइसकेको छ ।