वामदेव गौतम सरकारमा जाने हल्ला निराधार

काठमाडौं । वामदेव गौतम सरकारमा जाने हल्ला पुनः चलेको छ । सरकार पुनर्गठन हुने र त्यसमा उनलाई रोजेको मन्त्रालय दिने हल्ला बुधबारबाट चलाइएको छ । तर वामदेव निकटस्थ नेता कार्यकर्ताहरुले भने उनी सरकारमा जाने हल्ला पूर्णतः निराधार रहेको भन्दै सामाजिक संजालमा लेख्न थालेका छन् ।

यसअघि नै गौतमले सरकारमा मन्त्री खान नजाने कुरा प्रष्ट पारिसकेको भन्दै उनको बदनाम गर्न प्रधानमन्त्री केपी शर्मा ओलीका निकटस्थहरुले हल्ला चलाएको आरोप समेत लगाएका छन् । पछिल्लो समयमा एमसीसी प्रकरण चर्किएपछि गौतमलाई आफ्नो पक्षमा पार्न मन्त्रीको ललिपप फालिएको कुरा उठाइएको छ । सामाजिक संजालमा प्रधानमन्त्रीका कदमहरुका पक्षधरका रुपमा उहाँलाई चित्रित गर्ने क्रम बन्द गर्न पनि उनीहरुले आग्रह गरेका छन् । गौतमले ओलीका कार्यशैलीमाथि असहमति राख्दैआएका छन् ।

वामदेव यही कित्तामा अडिग हुनुहुन्छ । एमसीसीसहितका विभिन्न निर्णय प्रक्रियामा गौतम प्रधानमन्त्रीको साथमा नभएकाले बदनाम गर्न हल्ला चलाइएको उनीहरुको तर्क छ ।
सरकारमा पार्टीका संस्थागत निर्णय कार्यान्वयन नहुने, सरकार र पार्टी अलग किसिमले चल्नेबारे पार्टी नेताहरूको छिट्टै सामुहिक प्रतिक्रिया आउँदैछ । मन्त्री बन्ने हल्ला चलाउनेहरुका बारेमा अहिले गौतम केही नबोल्ने र केही समयपछि सार्वजनिक गर्ने उनी निकट एक नेताले बताएका छन् ।