बारको आन्दोलन आज पनि, चाँडो माग सम्बोधन नभए प्रधानन्यायाधीशको च्याम्बरमै प्रदर्शन गर्ने वकिलहरुको चेतावनी

काठमाडौं । प्रधानन्यायाधीश चोलेन्द्र शम्शेर जबराविरुद्ध निरन्तर आन्दोलन गर्दै आएको नेपाल बार एसोसिएसनले आज पनि सर्वोच्च परिसरमा धर्ना दिने बताएको छ। 

मंगलबार साँझ बसेको बारको बैठकले आगामी शुक्रबारसम्मका लागि थप आन्दोलनका कार्यक्रम घोषणा गर्दै अदालत अगाडि जारी धर्ना तथा प्रदर्शनका कार्यक्रमलाई निरन्तरता दिने जनाएको यो । साथै, आजदेखि १८ वटै उच्च अदालतमा समेत विरोध प्रदर्शन गर्ने बारले निर्णय गरेको छ ।

यस्तै, आन्दोलनका कार्यक्रममा आगामी मंसिर ३ गते शुक्रबारसम्म प्रधानन्यायाधीश जबराले राजीनामा नदिए केन्द्रीय प्रतिनिधि पठाएर उच्च अदालतहरूमा विरोध प्रदर्शन गर्ने बारको भनाइ छ । 

यस्तै, मंगलबार बारका महासचिव लिलामणि पौडेलले आफूहरूको माग सम्बोधन नभए प्रधानन्यायाधीश जबराको च्याम्बरमै पुगेर विरोध गर्ने चेतावनी समेत दिएका थिए। 

गत कार्तिक १४ गतेदेखि निरन्तर आन्दोलनमा रहेको बारले शुक्रबारदेखि नै प्रधानन्यायाधीश जबरालाई कार्यालय प्रवेशमा रोक्ने उद्देश्यले गेटमै धर्ना दिँदै आएको छ।  तर उनी प्रत्येक दिन चोरबाटो हुँदै कार्यकक्ष प्रवेश गर्ने गरेका छन्। 

कार्यपालिकासँग मिलेर राजनीतिक भागबण्डा खोजेकोलगायतका आरोप लगाएर बार र सहकर्मी न्यायाधीशहरु उनको राजीनामा माग्दै आन्दोलनमा उत्रिएका हुन्।