डा. शंकर शर्माः कांग्रेसमा छैंटौं पटक नियुक्ति पाउने भाग्यमानी  

काठमाडौं । नेपाली कांग्रेसको सरकार जब जब बन्छ, तबतब डा. शंकर शर्मा पटक पटक अवसर पाउनेमा पर्दछन् । नेपाली कांग्रेसमा कुनै योगदान नै नभए पनि प्रधानमन्त्री शेरबहादुर देउवाले अर्थशास्त्री शर्मालाई पटक पटक महत्वपूर्ण नियुक्ति गर्दैआएका छन् । डा. शर्मालाई बिहीबार बसेको मन्त्रिपरिषदको बैठकले भारतका लागि राजदूतमा सिफारिस गरेको छ ।

भारतका लागि राजदूत समेत गर्दा डा. शर्माको यो छैटौं नियुक्ति हो ।  देउवा अहिलेसम्म ५ पटक प्रधानमन्त्री भए । उनले तीन पटक प्रधानमन्त्री हुँदा शर्मालाई योजना आयोगको उपाध्यक्ष बनाए । २०७० मा स्व. सुशील कोइराला प्रधानमन्त्री हुँदा डा. शर्मालाई अमेरिकाको राजदूत नियुक्ति गरिएको थियो ।

अमेरिकाको राजदूतबाट २०७२ मा तत्कालीन प्रधानमन्त्री केपी शर्मा ओलीले फिर्ता बोलाए । ओली सरकारबाट बाहिरिएपछि नेकपा माओवादी र कांग्रेसको संयुक्त सरकार बन्यो । माओवादी अध्यक्ष पुष्पकमल दाहाल ‘प्रचण्ड’ प्रधानमन्त्री भए । प्रचण्ड र देउवाबीच आलोपालो प्रधानमन्त्री बन्ने सम्झौता बमोजिम २०७४ जेठ २४ मा देउवा चौथो पटक प्रधानमन्त्री भए ।  त्यसबेला डा. शर्मालाई उनले सल्लाहकार नियुक्त गरे ।

डा. शर्माको पुख्र्याैली घर ओखलढुंगाको साविक पोकली(हाल लिखु गाउँपालिका–९) भए पनि उनी बाल्यकालदेखि नै काठमाडौंमै हुर्केबढेका हुन् । अध्ययन सकेपछि उनी जागिर खान थाले । तर उनी जागिर खाइरहँदा कांग्रेसको आह्वानमा पंचायतबिरुद्धको आन्दोलनमा थुप्रैले ज्यान गुमाए, कतिको सर्वस्वहरण भयो । तिनीहरुमध्ये कतिपय अहिले पनि दुःख कष्ट झेल्दैछन् ।

जीवनका ऊर्जामय क्षण प्रजातन्त्र प्राप्तीका लागि न्यौछावर गरेका दोलखाका देवी न्यौपानेले राज्यको लाभको पद पाउनै सकेनन् । उनको इहलिला समाप्त भइसकेको छ । आन्दोलनमा लागेर केही नपाउने न्यौपानेहरुकोबारेमा कसैलाई चिन्ता र चासो रहेन । तर तिनै देवी न्यौपानेहरुको त्यागले आएको प्रजातन्त्रको फल डा. शंकर शर्माहरुले पाएका छन् ।  पंचायतबिरुद्धको संघर्षमा अतुलनीय योगदान गरेका बुद्धिजीवी, प्राध्यापकहरु थुप्रै भएको कांग्रेसको शासनमा डा. शर्मा सबैभन्दा बढी अवसर पाउनेमा पर्दछन् ।

एमालेमा डा. युवराज खतिवडाले ८ पटक अवसर पाए । एमालेमा कुनै योगदान नभएका उनले जस्तै कांग्रेसमा पनि डा. शर्माले पाउने गरेका छन् । २०४६ मा प्रजातन्त्र ल्याउन नेपाली कांग्रेस र कम्युनिष्टले ज्यानको आहुती दिंदै गर्दा डा. शर्मा त्रिविको सिनासमा जागिर खाइरहेका थिए । पंचायती ब्यवस्थाको गुणगानमै रमाउँदै सिनासमा जागिर खाएका डा. शर्माले कांग्रेस सरकारमा आएपछि एकपछि अर्को लाभ लिन सफल भए ।

डा. युवराज खतिवडा राष्ट्रबैंकमा सुखपूर्वक जागिर खाएर एमालेमा पटक पटक अवसर लिनेमा पर्दछन् । उनी त २०५८ असोज १८ मा तत्कालीन राजा ज्ञानेन्द्र शाहले देउवालाई सरकारबाट अक्षम भनेर हटाई लोकेन्द्रबहादुर चन्दलाई प्रधानमन्त्री बनाए । त्यसबेला उनलाई एमालेको कोटामा योजना आयोगमा नियुक्त गरिएको थियो । त्यो पदबाट नहटाइदिनका लागि उनी राप्रपा नेता जोगमेहर श्रेष्ठको घर सानेपामै पुगेर हारगुहार गरेको सूचना एमाले नेताहरुलाई भए पनि ओलीलाई तिनै प्रिय भए । एमालेमा क्षमतावान नेता हुँदाहुँदै खतिवडालाई अर्थमन्त्री नै बनाएर पुरस्कृत गरे । कांग्रेसमा पनि देउवाले त्यस्तै प्रवृत्तिलाई पुरस्कृत गर्ने क्रम जारी राखेका छन् ।  

प्रधानमन्त्री देउवाले डा. शर्मालाई असार २९ मा प्रधानमन्त्री नियुक्त हुनासाथ राष्ट्रिय योजना आयोगको उपाध्यक्ष बनाउन खोजेका थिए । तर उनले ३ पटक उपाध्यक्ष भएकाले भारतको राजदूत हुने चाहना राखेपछि डा. विश्व पौडेलले मौका पाएका हुन् । 

प्रधानमन्त्रीको सचिवालयमा छोराको इन्ट्री

पछिल्ला दिनमा डा. शर्माले छोरा सारिन घिमिरेलाई प्रधानमन्त्री देउवाको सचिवालयमा पठाएका छन् । नियुक्ति नै नभए पनि सारिनले देउवाको सचिवालयमा सहयोग गरिरहेका छन् । नेपाली कांग्रेसको वडा तहको अधिवेशनमा सारिनले काठमाडौं महानगरपालिका वडा नम्बर ३० बाट प्रतिनिधिका लागि उम्मेदवारी पनि दिएका थिए ।

युवानेता गगनकुमार थापाको क्षेत्र अन्तर्गत सबै वडामा सहमतिका साथ नेतृत्व चयन भएकाले उनलाई उम्मेदवारी फिर्ता गर्न भनियो । पराजीत हुने सुझाव दिएपछि उनले उम्मेदवारी त दिएनन् । तर केन्द्रीय कार्यालयमा आफूलाई वडामा उम्मेदवारी दर्ता गर्न नदिएको भनी कांग्रेस कार्यालयमा उजुरी दिएका थिए ।