प्रकाशमानको आक्रोश: गणेशमानको छोरा हुँदैमा सभापति बन्न नपाइने हाे ?

काठमाडाैं । नेपाली कांग्रेसका नेता प्रकाशमान सिंहले कांग्रेसको नेतृत्व कमजोर भएकै कारण कम्युनिष्टहरूको मनोबल बढेको बताएका छन् ।

१३ औं महाधिवेशनपछि कमजोर हातमा नेतृत्व गएको बताउँदै उनले यस्तै अवस्था रहे कांग्रेस कहाँ छ भनेर खोज्नुपर्ने अवस्था आउनेतर्फ सचेत गराएका छन् ।

काठमाडौं महानगरमा निर्वाचित पदाधिकारीहरूको शुभकामना आदान प्रदान तथा परिचायत्मक कार्यक्रममा बोल्दै नेता सिंहले पार्टी सभापति शेरबहादुर देउवाले विधान मिचेर विभागहरू गठन गरेको आरोप समेत लगाउका छन् ।

‘१३ औं महाधिवेशनपछि कांग्रेसले कमजोर नेतृत्व पायो । परिणामस्वरूप कम्युनिष्टको मनोबल बढ्दै गएको छ । १४ औं महाधिवेशनबाट डायानामिक सभापति रोज्नुको विकल्प छैन,’ उनले भने ।

उनले सभापति देउवा र वरिष्ठ नेता रामचन्द्र पौडेलपछि आफू वरिष्ठ रहेको दाबी समेत गरेका थिए ।

उनले यसबारे आफूले सभापति देउवा र बरिष्ठ नेता रामचन्द्र पौडेललाई समेत अव सभापतिमा उमेद्वारी घोषणा नगर्न सुझाएको बताएका थिए ।

‘मैले दुबै नेतालाई भनिसकेको छु,’ सिंहले भने, ‘काठमाडौंको भएकै कारण सभापति बन्न नपाउने ? गणेशमानको छोरा हुँदामै सभापति बन्न पाइँदैन ? सभापति बन्न नहुने उहाँहरूले कारण देखाइ दिनु पर्‍यो । गणेशमानको परिवारले सँधै त्याग मात्र गर्नुपर्ने ?’