अख्तियारकाे छापापछि विपक्षीकाे माग- इज्जत जोगाउनकै लागि भएपनि पदबाट राजीनामा दिनुस्

जनकपुरधाम । प्रदेश २ को मुख्यमन्त्री कार्यालयमा अख्तियार दुरुपयोग अनुसन्धान आयोगले छापा मारेपछि विपक्षी दलले मुख्यमन्त्री लालबाबु राउतको राजीनामा माग गरेका छन् ।

मुख्यमन्त्रीमाथि गम्भीर आरोपसहित अख्तियारले मुख्यमन्त्री कार्यालयमै आएर छापा मारेपछि नैतिक प्रश्न खडा भएको भन्दै प्रदेशको इज्जत जोगाउनका लागि पनि नैतिकताको आधारमा मुख्यमन्त्रीले राजीनामा दिनुपर्ने विपक्षीकाे माग छ।

प्रमुख प्रतिपक्षी लोकतान्त्रिक समाजवादी पार्टी नेपालका प्रदेशसभा सदस्य परमेश्वर साहले पटक पटक ‘बेटी बचाउ बेटी पढाउ’ अभियान अन्र्तगत साइकल खरिदमा अनियमितताबारे आवाज उठाउँदा समेत सुनुवाइ नभएको अवस्थामा अख्तियारले छापा मारेर राम्रो काम गरेका बताएका छन् ।

एउटा योजनामा मात्रै नभई स्वच्छता अभियानलगायत दर्जनौँ योजनामा भ्रष्टाचार भएको तथ्यलाई महालेखापरीक्षकको प्रतिवेदनले समेत प्रमाणित गरिसकेको अवस्थामा ती सबैमा अख्तियारले छानबिन गर्नुपर्ने उनको भनाइ छ ।

अख्तियारले प्रदेश २ सरकारको ‘बेटी बचाउ बेटी पढाउ’ अभियानअन्तर्गत खरिद गरिएको साइकलमा व्यापक अनियमितता भएको भन्दै अख्तियारले बुधबार मुख्यमन्त्रीको कार्यालयमै छापा मारेर विभिन्न फाइल नियन्त्रणमा लिएको थियो ।