चीनबिरुद्ध प्रदर्शन, तुईन प्रकरणबाट ध्यान मोड्ने ‘रअ’को अर्को अस्त्र 

काठमाडौं । भारतीय गुप्तचर संस्था ‘रअ’ले नेपालमा चीनबिरुद्धका गतिबिधिलाई अगाडि बढाउने क्रम जारी राखेको छ । चीनको नेपालसँग सीमा विवादै नभए पनि नेपाली कांग्रेसका उपसभापति बिमलेन्द्र निधि र जीवनबहादुर शाहीमार्फत् पार्टीमा कुरा उठाई कार्यदल गठन गर्नुपर्ने स्थिति सृजना गरेको थियो । कार्यदलका संयोजक गृहमन्त्रालयका सहसचिव जयनारायण आचार्यको समितिले आइतबार बुझाएको प्रतिवेदनमा चीनले सीमा मिचेको ठोस सबुत नभेटिएको उल्लेख गरेको छ ।

चीनले सीमा मिचेको ठोस प्रमाण नै नभए पनि ‘रअ’ले मंगलबार काठमाडौंमा चीनबिरुद्ध प्रदर्शन गराएको छ । लोकतान्त्रिक समाजवादी पार्टी(लोसपा) निकट युवासंघले मंगलबार हुम्लामा चीनले नेपाली सीमा अतिक्रमण गरेको भन्दै बिरोध प्रदर्शन गरेको हो ।

भारतीय सीमा सुरक्षा बल(एसएसबी)ले नदी तरिरहेको अवस्थामा तुईन काट्दा दार्चुला ब्यासका जयसिंह धामीको महाकाली नदीमा डुबेर मृत्यु भएको घटना ओझेलमा पार्न ‘रअ’ले चीनसँगको सीमा विवादको बिषय निकाल्न लगाएको थियो । धामीको मृत्यु एसएसबीले तुईन काटेकै कारण भएकाले दार्चुलाबासीदेखि देशका सबै क्षेत्रबाट बिरोध भएपछि भारतले त्यसबाट ध्यान मोड्न चीनसँगको हुँदै नभएको सीमा विवादको बिषय नेपाली कांग्रेसका नेताहरु निधि र शाहीमार्फत् उठाएको थियो ।

सरकारले चीनसँगको सीमा विवाद अध्ययन गर्न गठित कार्यदलले मिचिएको प्रमाण भेट्टाउन नसकेपछि ‘रअ’ले आज युवाका नाममा बिरोध प्रदर्शन गर्न लगाएको छ ।