एमालेको केन्द्रीय कमिटी बैठकमा तेस्रो धारका नेताको अपमान, ९ टोलीनेतामा एकजना पनि परेनन्

काठमाडौं । नेकपा एमालेको शुक्रबारदेखि सुरु भएको केन्द्रीय कमिटी बैठक आज पनि जारी छ । पार्टीको केन्द्रीय कमिटी बैठकमा तेस्रो धारका नेताहरुलाई समूहको नेता बन्नबाट समेत बन्चित गरिएको छ । एमाले अध्यक्ष केपी शर्मा ओलीले १० बुँदे जस्ताको तस्तै लागू नहुने भनेर तेस्रो धारका नेताहरुको हैसियत देखाइदिएकै थिए । केन्द्रीय कमिटी बैठकमा टोली नेता समेत बन्न नदिएपछि एमालेभित्र तेस्रो धारको हरिबिजोग भएको छ ।  
 एमालेको जारी केन्द्रीय कमिटी बैठकमा प्रस्तुत प्रतिवेदनमाथि १० वटा समूह बनाएर गरिएको छलफलमा ओलीले तेस्रो धारका नेताहरुलाई बोल्ने मौका समेत नदिई निषेध गरेका छन् ।

ललितपुरस्थित तुलसीलाल स्मृति भवनमा बसेको बैठकमा १० वटा समूह बनाएर छलफल प्रारम्भ गरिएको थियो । तर १० वटा समूहमा तेस्रो धारका नेताहरुलाई समेटिएको छैन ।

शुक्रबार अध्यक्ष केपी शर्मा ओलीको राजनीतिक प्रतिवेदन, महासचिव ईश्वर पोखरेलको संगठनात्मक प्रतिवेदन र उपमहासचिव विष्णुप्रसाद पौडेलको विधान संशोधन प्रस्तावमाथि समूहगत छलफल सुरु भएको थियो । तर दशवटै समूहको टोली नेता चयन गर्दा तेस्रो धारका नेताहरुलाई बन्चित गरिएको छ । समूहगत छलफलको टोलीनेता सबै केपी शर्मा ओली निकट नेताहरु छन् ।

समूहगत छलफलका लागि छानिएका टोलीनेतामा प्रदेश १ बाट हिक्मत कार्की, प्रदेश २ बाट रामचन्द्र मण्डल, बागमतीबाट आनन्द पोखरेल, गण्डकीबाट जगत विश्वकर्मा, लुम्बिनीबाट दलबहादुर राना र कर्णालीबाट यमलाल कँडेल छन् । सुदूरपश्चिमबाट कर्ण थापा, उपत्यका विशेषबाट माधव ढुंगेल र जनवर्गीय संगठन तथा विभागहरुबाट खिमलाल भट्टराईलाई राखिएको छ ।

नेकपा एमालेका उपाध्यक्षत्रय भीम रावल, अष्टलक्ष्मी शाक्य र युवराज ज्ञवाली, उपमहासचिव घनश्याम भुसाल एकताको पक्षमा रहे । सचिवहरु गोकर्ण विष्ट, योगेश भट्टराई र भीम आचार्य, स्थायी कमिटी सदस्य सुरेन्द्र पाण्डे, रघुजी पन्त, अनुशासन आयोगका प्रमुख अमृत बोहरा पार्टी विभाजनको पक्षमा लागेनन् । तर पार्टी एकताको पक्षम १० बुँदे अनुमोदन गरेको एमालेले पछिल्ला दिनमा त्यो लागू नगरी तेस्रो धारका नेताहरुलाई अपमान गर्दैआएको छ ।

एमालेले जेठ २ मा फर्किने भने पनि सुदूरपश्चिम प्रदेशको इन्चार्ज भीम रावललाई मान्यता नदिई लेखराज भट्ट नै हुने घोषणा गर्नेदेखि सर्लाही, सिरहा, बारा जस्ता जिल्ला कमिटीको बारेमा पनि तेस्रो धारको माग सुनुवाइ नगरेको गुनासो छ । ओलीका निकट नेता रघुवीर महासेठले जेठ २ लागू हुन नसक्ने भनेपछि सिरहाका अध्यक्ष प्रमोद यादव र बाराका सुन्दर यादव नेकपा समाजवादीमा गइसकेका छन् । सर्लाहीका अध्यक्ष रेवती पन्तलाई पनि अस्वीकार गरी समाजवादीतिरै पठाउने योजनामा ओली पक्ष छ । सर्लाहीमा रघुवीर महासेठले जेठ २ का अध्यक्ष पन्तलाई मान्यता नदिने, राजनारायण साह नै अध्यक्ष कायम हुने फर्मान जारी गरिसकेका छन् ।