नेम्वाङकाे गुनासाे: पार्टी फुटाउने र ओली सरकारविरूद्ध मुद्दा लड्नेले मेडल पाए

काठमाडाैं । नेकपा एमालेका नेता सुवासचन्द्र नेम्वाङले पार्टी फुटाउने र केपी शर्मा ओली सरकारविरूद्ध मुद्दा लड्नेले मेडल पाएको भन्दै गुनासाे गरेका छन् । 

यसले राम्रो सन्देश नगएको भन्दै एमाले संसदीय दलका उपनेता सुवासचन्द्र नेम्वाङले मेडल अस्वीकार गर्न समेत सम्बन्धित सबैलाई आग्रह गरेका छन् ।

संविधान दिवसको अवसरमा आइतबार नेकपा एमालेले गरेको कार्यक्रममा बाेल्दै पूर्वसभामुख नेम्वाङले भने,‘परमादेशबाट सरकार स्थापित भएको घोषणा गर्ने अदालतका सम्बन्धित न्यायाधीशहरू र त्यो सरकारको विरूद्धमा मुद्दा दर्ता गर्ने मुद्दावालाहरू त्यसका पक्षहरू, उहाँहरूले मेडल पाउनुभएछ ।’

उनले झलनाथ खनाललाई लक्षित गर्दै भारतमा रहेर पार्टी फुटाउन भूमिका खेलेका नेताले पनि मेडल पाएको बताएका छन् । 

‘एक जना साथी दिल्लीमा हुनुहुन्थ्यो । दिल्लीबाटै पार्टी फुटाउन भूमिका खेल्नुभयो उहाँले मेडल पाउनुभएछ । दुई जना नेताहरू यहीँ क्रियाशील हुनुहुन्थ्यो उहाँहरूका परिवारका महत्वपूर्ण सदस्यले मेडल पाउनुभएछ,’ उनले भने, ‘म व्यक्तिगत रूपमा टिप्पणी गर्दिनँ । पार्टी र सरकारको विरूद्धमा मुद्दा लगाउने साथीहरूले मेडल पाउनुभएछ ।’