एमाले अनेरास्ववियुको अध्यक्षमा बराल, महासचिव बने समिक

काठमाडौं । नेकपा(एमाले) निकट अनेरास्ववियुको अध्यक्षमा झापाकी सुनिता बराल चयन भएकी छन् । उपाध्यक्ष बराललाई एमाले अध्यक्ष केपी ओलीकै जोडबलमा अध्यक्ष मनोनीत गरिएको छ । अनेरास्ववियुमा अध्यक्षका प्रत्यासी उपाध्यक्ष रश्मी आचार्य, महेश बर्तौला, शैलेश लामा थिए । तर ओलीले झापाकै बराललाई अध्यक्ष मनोनीत गरेका छन् । अनेरास्ववियुको महासचिवमा समिक बडाल चयन भएका छन् ।

त्यसैगरी, बरिष्ठ उपाध्यक्षमा आरसी लामिछाने चयन भएका छन् । उपाध्यक्षहरुमा झपिन्द्र खत्री, उमेश आचार्य, निशा अधिकारी, यमराज पाण्डे, मोति विक, चन्द्र थिङ, कल्पना बाइवालगायत चयन भएका छन् । 

उपमहासचिवहरुमा नारायण घर्ती, गोविन्द गिरी, नरेश रोकायासहित चयन भएका छन् । 

नेकपा एकता भएपछि २०७५ मा ओलीले अनेरास्ववियुको अध्यक्षमा महासचिव ऐन महरलाई चयन गरेका थिए । अरु जनसंगठनमा उपाध्यक्ष अध्यक्ष भएका थिए तर अनेरास्ववियुमा महासचिवलाई संयोजक बनाइएको थियो । युवासंघ माओवादीलाई दिएर ओलीले महरलाई अध्यक्ष बनाउनकै लागि अनेरास्ववियु एमालेको भागमा लिएका थिए ।