नेपाललाई रावलको जवाफ– कसैले धकेल्दा धकेलिने रहेछन् त पछाडि फर्काउन खोज्दा पनि फर्किनु पर्ने हैन र ?

काठमाडौं । नेकपा एकीकृत समाजवादीका अध्यक्ष माधव कुमार नेपालले आफूलाई पार्टी विभाजनको डिलसम्म पुर्‍याएर अन्तिममा नेताहरूले साथ छाडेको भन्ने अभिव्यक्तिमा एमाले उपाध्यक्ष भीम रावलले सामाजिक सन्जालबाट जवाफ फर्काएका छन् ।

शनिबार राजधानीमा आयोजित एक कार्यक्रममा बाेल्दै अध्यक्ष नेपालले आफूलाई घचेटेर अगाडि बढ् भनेको तर पछाडि फर्किएर हेर्दा कोही नपाएको बताएका थिए ।

नेपालकाे उक्त अभिव्यक्ति प्रति रावलले सामाजिक सञ्जालमार्फत् लेखेका छन्- ‘कोही नेता कसैले अगाडि धकेल्दा धकेलिने रहेछन् भने पछाडि फर्काउन खोज्दा पछाडि पनि फर्किनु पर्ने हो ।’

‘द्वन्द्वको स्थितिमा अलगिने मनस्थिति हुन्छ भने सहमति भइसकेपछि एक भई मेलमिलाप गर्ने कुरा मुख्य हुन्छ भन्ने सत्य बुझ्न धेरै अध्ययनको आवश्यकता हुन्न । जिम्मेवारीबोध महत्वपूर्ण कुरा हो’, उनले ट्वीटरमा लेखेका छन् ।

अध्यक्ष नेपालले शनिबारको एक कार्यक्रममा आफूलाई आजै पार्टी खोलौं, भोलि पार्टी खोलौं भनेर दोस्रो तहका नेताहरुले दबाब दिएको र निर्वाचन आयोगमा दुई वटा पार्टी समेत दर्ता गराएको समेत बताएका थिए । 

कोही नेता कसैले अगाडि धकेल्दा धकेलिने रहेछन् भने पछाडि फर्काउन खोज्दा पछाडि पनि फर्किनु पर्ने हो।द्वन्द्वको स्थितिमा अलगिने मनस्थिति हुन्छ भने सहमति भइसकेपछि एक भई मेलमिलाप गर्ने कुरा मुख्य हुन्छ भन्ने सत्य बुझ्न धेरै अध्ययनको आवश्यकता हुन्न।जिम्मेवारीबोध महत्वपूर्ण कुरा हो।

— Dr. Bhim Rawal (@BhimRawal179) August 29, 2021